10:58, 12 Yanvar 2017 (Cümə axşamı) 154

Prokuror Şamaxıda qardaşını qətlə yetirməkdə təqsirləndirilən şəxsə ağır cəza istəyib

Prokuror Şamaxıda qardaşını qətlə yetirməkdə təqsirləndirilən şəxsə ağır cəza istəyib
/ ÖLKƏ

Bakı. 12 yanvar. / Bu gün Bakı Ağır Cinayətlər Məhkəməsində Şamaxı rayonunda qardaşını odlu silahla qətlə yetirməkdə təqsirləndirilən Rəşidzadə Azad Əli oğlunun cinayət işi üzrə məhkəmənin növbəti iclası keçirilib.

“Report”un xəbərinə görə, hakim Əhməd Quliyevin sədrliyi ilə keçirilən prosesdə dövlət ittihamçısı çıxış edib.

Prokuror çıxışında A.Rəşidzadənin 20 il müddətinə azadlıqdan məhrum edilməsini istəyib.

Daha sonra təqsirləndirilən şəxsin vəkili Günay Hacıyeva müdafiə çıxışı edib. O, müvəkkilinin günahsız olduğunu, dövlət ittihamçısının istədiyi cəza ilə razı olmadığını bildirib. Vəkil məhkəmədən ədalətli cəza təyin edilməsini istəyib.

Məhkəmənin növbəti prosesi yanvarın 19-na təyin edilib.

İttiham aktına əsasən, Şamaxı rayon sakini 1971-ci il təvəllüdlü Rəşidzadə Azad Əli oğlu ailə münaqişəsi zəminində ov tüfəngi ilə qardaşı 1967-ci il təvəllüdlü Rəşidov Azər Əli oğlunu güllələyib. Nəticədə ağır xəsarətlər alan A.Rəşidov hadisə yerində dünyasını dəyişib.

Bundan başqa, hadisə zamanı A.Rəşidzadə onun qarşısını kəsən öz həyat yoldaşı 1982-ci il təvəllüdlü İbadova Möminə Əlişah qızına da atəş açıb. Güllə qadının qolunu yaralayıb. Daha sonra M.İbadova Şamaxı rayon Mərkəzi Rayon Xəstəxanasının cərrahiyyə şöbəsinə yerləşdirilib.

Hadisəni törədən A.Rəşidzadə isə polis əməkdaşlarının əməliyyat-axtarış tədbirləri nəticəsində saxlanılıb.

O, Cinayət Məcəlləsinin 120.2.4-cü (qəsdən adam öldürmə, xüsusi amansızlıqla və ya ümumi təhlükəli üsulla adam öldürmə), 29, 120-ci (qəsdən adam öldürməyə cəhd) maddələri ilə ittiham olunur.