Sentyabrın 20-də Xocavənd şəhərində ilk dəfə Şəhər Günü qeyd edilib, bu tarix Azərbaycanda Dövlət Suverenliyi Günü ilə üst-üstə düşüb.
Sentyabrın 20-si Xankəndi, Xocalı, Xocavənd və Ağdərə şəhərlərinin günü kimi qeyd olunur. Bu tarixdə Mədəniyyət Nazirliyi, habelə Azərbaycan Prezidentinin Ağdam, Füzuli və Xocavənd rayonları üzrə xüsusi nümayəndəliyinin təşkilatçılığı ilə Xocavənddə ilk dəfə Şəhər Günü keçirilib.
Eyni gün Azərbaycanda Dövlət Suverenliyi Günü kimi də qeyd olunur. Hər iki tarixi hadisə münasibətilə Xocavənd şəhərinin mərkəzi parkı bayram əhval-ruhiyyəsinə uyğun bəzədilib.
Şəhər Günü çərçivəsində parkda təsviri sənət üzrə master-klas təşkil olunub. Tədbiri Muzey Mərkəzi hazırlayıb və Xocavəndə qayıdan məktəblilər peşəkar rəssamların rəhbərliyi altında rəsm bacarıqlarını nümayiş etdiriblər.
Uşaqlar əsasən Qarabağın təbiət gözəlliklərini kətan üzərinə köçürüblər.
Tədbirin sonunda Ağdam, Füzuli və Xocavənd rayonları üzrə Azərbaycan Prezidentinin xüsusi nümayəndəsi Emin Hüseynov və mədəniyyət nazirinin müavini Murad Hüseynov balaca rəssamların əl işləri ilə tanış olub. Uşaqlar isə çəkdikləri rəsmlər haqqında qonaqlara məlumat verib.
