Son xəbər: Qulu Ağsəsin şeiri ABŞ nəşrində dərc olundu
Prezident İlham Əliyev ötən gün dünyanın aparıcı investisiya şirkətlərinin rəhbərlərini qəbul edib, Azərbaycanla enerji, infrastruktur və rəqəmsal texnologiyalar sahəsində əməkdaşlığın genişləndirilməsi müzakirə olunub.
Prezident İlham Əliyev ötən gün dünyanın aparıcı investisiya şirkətlərinin rəhbərlərini qəbul edib. Görüşlərdə Azərbaycanla enerji, infrastruktur və rəqəmsal texnologiyalar sahəsində əməkdaşlığın genişləndirilməsi imkanları müzakirə olunub.
Dövlət başçısı ilk olaraq "Brookfield Asset Management" şirkətinin baş icraçı direktoru Konnor Teski ilə görüşüb. Söhbət zamanı tərəflər bu ilin yanvar ayında Davosda keçirilmiş əvvəlki görüşü məmnunluqla xatırlayıblar.
Görüşdə Azərbaycan Respublikası Dövlət Neft Fondu (ARDNF) ilə "Brookfield Asset Management" arasında imzalanmış uzunmüddətli strateji əməkdaşlıq niyyət protokolunun əhəmiyyəti vurğulanıb.
Tərəflər enerji keçidi, bərpaolunan enerji mənbələri, enerji saxlama sistemləri və rəqəmsal infrastruktur sahələrində yeni layihə imkanlarını araşdırıblar. Söhbətdə Azərbaycanın enerji potensialının ölkəni regional enerji mərkəzinə çevirməkdəki rolu da vurğulanıb.
Şirkət qlobal miqyasda enerji, telekommunikasiya, rəqəmsal infrastruktur və nəqliyyat kimi real aktivlərin ən iri sahib və operatorlarından biri sayılır.
Prezidentin ötən günkü digər qəbulu "BlackRock" şirkətinin tərkibində fəaliyyət göstərən "Global Infrastructure Partners" (GIP) şirkətinin təsisçisi, sədri və baş icraçı direktoru Adebayo Oqunlesi ilə keçirilib.
Görüşdə ARDNF, "BlackRock" və GIP arasında Davosda imzalanmış uzunmüddətli əməkdaşlıq niyyət protokolunun əhəmiyyətinə toxunulub. Tərəflər mövcud əməkdaşlığın nəticələrindən məmnunluqlarını bildiriblər və gələcək perspektivlər ətrafında fikir mübadiləsi aparıblar.
Söhbət zamanı Azərbaycanın infrastruktur sahəsindəki investisiya potensialı, o cümlədən rəqəmsal və nəqliyyat infrastrukturu istiqamətləri də nəzərdən keçirilib.
Qeyd edilib ki, "Global Infrastructure Partners" 2024-cü ildən "BlackRock"un tərkibində fəaliyyət göstərir. İdarə olunan aktivlərinin həcmi 15,3 trilyon ABŞ dolları olan "BlackRock" enerji, nəqliyyat, rəqəmsal infrastruktur, su və tullantıların idarə olunması sahələrində ixtisaslaşıb. GIP-in idarə etdiyi aktivlərin həcmi isə 170 milyard ABŞ dollarıdır. Şirkət həmçinin "BlackRock", "Microsoft" və "MGX" ilə birlikdə qlobal Süni İntellekt İnfrastruktur Fondunun əsas təsisçilərindəndir.
Sentyabrın 25-də Prezident İlham Əliyev "Neuberger Berman" şirkətinin sədri və baş icraçı direktoru Corc Volkeri qəbul edib.
Görüşdə dövlət başçısı bu ilin fevral ayında imzalanmış "Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası"nı xatırladaraq, ikitərəfli münasibətlərdə yeni mərhələnin başladığını vurğulayıb.
Tərəflər Azərbaycan ilə "Neuberger Berman" arasında investisiya əməkdaşlığının hazırkı vəziyyətini və perspektivlərini müzakirə ediblər. Söhbətdə qlobal investisiya bazarlarında yaranan yeni imkanlar və uzunmüddətli tərəfdaşlığın genişləndirilməsi məsələləri də yer alıb.
Bildirilib ki, 2016-cı ildən ARDNF ilə "Neuberger Berman" arasında səmərəli əməkdaşlıq davam edir.
1939-cu ildə Nyu-Yorkda yaradılmış "Neuberger Berman" dünyanın iri müstəqil investisiya şirkətlərindən biri sayılır. Aktivlərinin ümumi həcmi 613 milyard ABŞ dolları olan şirkətin özəl bazarlar üzrə qlobal investisiya platforması 170 milyard ABŞ dollarından artıq investisiya öhdəliyini idarə edir. Bu platformanın investisiya etdiyi fondların portfelləri 10 min 400-dən çox şirkəti əhatə edir.
