Azərbaycan Dövlət Təhlükəsizliyi Xidmətinin təşkilatçılığı ilə Bakıda IV Təhlükəsizlik Forumu öz işinə başlayıb, tədbirdə 100-dən artıq ölkənin xüsusi xidmət qurumlarının rəhbərləri iştirak edir.
Forum "Qlobal təhlükəsizlik arxitekturasında yeni çağırışlar və terrorçuluğa qarşı effektiv əməkdaşlıq mexanizmlərinin formalaşdırılması" mövzusu altında keçirilir. Tədbirin açılışından sonra Prezident İlham Əliyevin forum iştirakçılarına ünvanladığı müraciət səsləndirilib.
DTX rəisi general-polkovnik Əli Nağıyev çıxış edərək bildirib ki, forum Prezidentin təşəbbüsü ilə yaradılıb və hər il əhatə dairəsini genişləndirir. O, iştirakçıları yenidən Bakıda salamlamaqdan məmnun olduğunu vurğulayıb.
Müzakirələr zamanı bildirilib ki, Bakı forumu xüsusi xidmət və təhlükəsizlik qurumları arasında mühüm dialoq meydançasına çevrilib. Təxminən 600 yüksək səviyyəli nümayəndənin toplaşması 2023-cü ildən başlayan davamlı dialoqun coğrafi əhatəsinin artdığını göstərir.
Tərəfdaş qurumların rəhbərlərinin bu qədər geniş təmsil olunması Bakı platformasına inamın göstəricisi kimi dəyərləndirilib. Bu, həmçinin milli təcrübələrin müqayisəsi və birgə həll yollarının axtarışı üçün şərait yaradır.
Qeyd olunub ki, iştirakçı ölkələr arasında siyasi yanaşma fərqləri olsa da, forum əməkdaşlığı təşviq edir və ortaq təhdidlərə qarşı ünsiyyət kanallarının açıq qalmasına kömək edir.
Diqqətə çatdırılıb ki, beynəlxalq təhlükəsizlik sistemi transformasiya dövründədir - terrorçuluq, transmilli cinayətkarlıq, qeyri-qanuni miqrasiya, narkotik ticarəti və kiberhücumlar artmaqdadır. Bu cür sərhədaşırı problemlərlə tək-tənha mübarizə aparmaq mümkün olmadığından etibarlı tərəfdaşlığın vacibliyi vurğulanıb.
Forumda bildirilib ki, təhlükəsizlik anlayışı təkcə sərhədlərin qorunmasından ibarət deyil. Enerji, nəqliyyat, bank sistemi, su ehtiyatları, rabitə və informasiya sahələri dövlət xidmətlərinin dayanıqlığı üçün mühüm elementlər sayılır.
Eyni zamanda qeyd edilib ki, kiber imkanlar, süni intellekt və kosmik texnologiyalar uğrunda qlobal rəqabət güclənir. Silahlanmaya çəkilən xərclər və davam edən münaqişələr regional proseslərə, enerji və ərzaq təhlükəsizliyinə mənfi təsir göstərərək terrorçuluq üçün münbit şərait yaradır.
Vurğulanıb ki, dünyanın istənilən bölgəsində yaranan böhran qısa zamanda qlobal miqyaslı təhlükəyə çevrilə bilər. Bakı Təhlükəsizlik Forumu çərçivəsində risklərin və təhdidlərin birgə qiymətləndirilməsi ölkələrin bu cür hallara daha hazırlıqlı yanaşmasına imkan yaradır.
