Azərbaycanda ilk rəsmi “LEGO Certified Store” mağazası 3 oktyabr 2026-cı ildə Bakıdakı “Gənclik Mall”da açılacaq. Layihə “LEGO Group” və “TORGROUP Global” şirkətlərinin tərəfdaşlığı ilə həyata keçirilir.
Azərbaycanda LEGO həvəskarları üçün yeni bir məkan fəaliyyətə başlayacaq: ölkənin ilk rəsmi “LEGO Certified Store” mağazası 3 oktyabr 2026-cı ildə Bakıda qapılarını açacaq. Layihə “LEGO Group” və “TORGROUP Global” şirkətlərinin tərəfdaşlığı çərçivəsində həyata keçirilir.
Mağaza “PASHA Malls”un tərkibinə daxil olan “Gənclik Mall”da yerləşəcək. Burada müxtəlif yaş qruplarına və mövzulara uyğun geniş LEGO məhsulları çeşidi təqdim olunacaq, ziyarətçilərə isə xüsusi hazırlıqlı mütəxəssislər — Brick Specialists — kömək göstərəcək.
Yeni məkan sadəcə alış-veriş yeri deyil, həm də interaktiv əyləncə mühiti kimi düşünülüb. Ziyarətçilər burada “Pick a Brick” və “Build a Minifigure” kimi fəaliyyətlərdə iştirak edə, LEGO pasportu əldə edə biləcəklər.
Mağazanın ən diqqətçəkən elementlərindən biri Minifiqur Skaneridir. Bu qurğunun qarşısında dayanan qonaqlar özlərini LEGO minifiquru formasında ekranda görə biləcəklər — bu, ziyarəti sadə alış-verişdən fərqli, fərdiləşdirilmiş təcrübəyə çevirir.
“LEGO Group”un Türkiyə, Mərkəzi Asiya və Qafqaz regionları üzrə baş meneceri Esteban Davalos açılışın əhəmiyyətini belə izah edib:
“Azərbaycanda ilk “LEGO Certified Store”un açılması brend təcrübəsinin ölkədə, xüsusilə, Bakıda genişlənməsi baxımından mühüm addımdır. Tərəfdaşımızla birlikdə uşaqların, ailələrin və hər yaşdan LEGO sevənlərin bir araya gəlib qura, yarada və oynaya biləcəyi bir məkan yaratmaqdan məmnunuq. LEGO ilə oynamağın sonsuz imkanları vasitəsilə təsəvvürü və yaradıcılığı dəstəkləməyi və Bakının bir hissəsinə çevrilməyi səbirsizliklə gözləyirik.”
“TORGROUP”un təsisçisi və sədri Eran Tor da açılışın şirkət üçün önəmli mərhələ olduğunu vurğulayıb:
“Azərbaycanda ilk rəsmi “LEGO Certified Store”un açılışı bizim üçün xüsusi bir mərhələdir və “TORGROUP Global”ın beynəlxalq inkişafında mühüm rol oynayır. “LEGO Group” və “PASHA Malls” ilə birlikdə əsl LEGO təcrübəsini Bakıya gətirməkdən qürur duyuruq. Məqsədimiz sadəcə mağaza açmaq yox, həmçinin Azərbaycandakı LEGO sevənlər üçün uşaqların, ailələrin və həvəskarların bir araya gəlib kəşf etdiyi və xatirələr topladığı bir məkan yaratmaqdır. Qazaxıstandakı fəaliyyətimizin ardınca Bakı LEGO brendinin regiondakı uzunmüddətli mövcudluğunu qurmaq yolunda növbəti vacib addımdır. Əsas məqsədimiz isə dəyişməz olaraq qalır: insanlarda təbəssüm yaratmaq.”
3 oktyabr 2026-cı il tarixində keçiriləcək tədbirə bütün LEGO həvəskarları dəvət olunub. Gün ərzində VIP qonaqlar və media nümayəndələri üçün ayrıca açılış proqramı, rəsmi açılış mərasimi və əyləncə fəaliyyətləri təşkil olunacaq.
“PASHA Malls” nümayəndəsi açılışla bağlı bildirib:
“Azərbaycanda ilk rəsmi “LEGO Certified Store”u “Gənclik Mall”da qarşıladığımız üçün çox məmnunuq. LEGO ailə üzvlərini yaradıcılıq ətrafında bir araya gətirən və buna görə də ən sevilən brendlərdən biridir. Bu təntənəli açılışın məhz “Gənclik Mall”da baş tutmasından qürur duyur və inanırıq ki, mağaza Bakıda ailələr, uşaqlar və LEGO sevən hər kəs üçün əsas ünvana çevriləcək.”
“LEGO Group” 1932-ci ildə Danimarkanın Billund şəhərində Ole Kirk Kristiansen tərəfindən təsis edilib. Şirkətin adı dan dilində “yaxşı oyna” mənasını verən “LEg GOdt” ifadəsindən götürülüb. Baş ofisi Billundda yerləşən şirkət hazırda ailə müəssisəsi kimi fəaliyyət göstərir və məhsullarını 120-dən çox ölkədə satır.
“TORGROUP Global” isə müxtəlif bazarlarda premium pərakəndə satış təcrübəsi və uzunmüddətli LEGO icmaları formalaşdırmağa yönəlmiş beynəlxalq LEGO Certified Store tərəfdaşıdır. Şirkətin fəaliyyət fəlsəfəsi “insanlarda təbəssüm yaratmaq” prinsipinə əsaslanır və Qazaxıstandakı təcrübəsinin ardından Bakıda yeni addım atır.
