Bakı Avrasiya Universitetində (BAAU) “Tətbiqi və humanitar elmlər arasında elmi inteqrasiya – Dayanıqlı inkişaf və rəqəmsal transformasiyanın problemləri” adlı III Beynəlxalq Elmi Konfrans baş tutub.
Tədbir BAAU ilə İordaniyanın İrbid Milli Universitetinin birgə təşkilatçılığı ilə reallaşıb. Konfransa universitetin rektoru, dosent Səyavuş Qasımov, BAAU-nun professor-müəllim heyəti, İordaniya Haşimilər Krallığının Azərbaycandakı səfiri Ömər Bərəkət əl-Nahar, İrbid Milli Universitetinin rektoru professor Majid Abu Zureiq, həmin universitetdən nümayəndə heyətinin başçısı professor Milud Murad, Təşkilat Komitəsinin sədri Hüseyn Əl-Rəbabaa qatılıb.
Bundan başqa, Təşkilat Komitəsinin Azərbaycan tərəfdən sədri, BAAU-nun Ərəbşünaslıq Mərkəzinin rəhbəri dosent Ülviyyə Hüseynova da tədbirdə iştirak edib. Səudiyyə Ərəbistanı, Birləşmiş Ərəb Əmirlikləri, Oman, İraq, Mərakeş, İordaniya, Əlcəzair, Fələstin və başqa ərəb dövlətlərini təmsil edən 98 nəfərlik nümayəndə heyəti də konfransa qoşulub.
Tədbir Azərbaycan və İordaniya Haşimilər Krallığının dövlət himnlərinin ifası ilə başlanıb, ardınca Qurani-Kərimdən qiraət təqdim olunub. Açılışda çıxış edən Səyavuş Qasımov konfransın mövzusunun müasir elmi çağırışlar baxımından önəmli olduğunu bildirib.
O, tətbiqi və humanitar sahələr arasında əlaqələrin gücləndirilməsi, elmi tədqiqatların praktiki dəyərinin artırılması, eləcə də dayanıqlı inkişaf və rəqəmsal transformasiya ilə bağlı araşdırmaların genişləndirilməsinin zəruriliyini vurğulayıb. Rektor Azərbaycan ilə ərəb dünyası arasında elmi-akademik əməkdaşlıq üçün mövcud potensialdan da bəhs edib.
Qasımov süni intellekt, alternativ enerji mənbələri, ağıllı kənd təsərrüfatı, mədəni irsin rəqəmsallaşdırılması, rəqəmsal tərcümə və ali təhsildə innovativ texnologiyaları gələcək birgə tədqiqat sahələri kimi qeyd edib. O həmçinin xarici universitetlərlə əməkdaşlığın, akademik mübadilənin və beynəlxalq layihələrdə iştirakın BAAU-nun inkişaf strategiyasında əhəmiyyətli yer tutduğunu, ərəb ölkələrinin ali məktəbləri ilə əlaqələrin bu strategiyanın mühüm hissəsi olduğunu bildirib.
İrbid Milli Universitetinin rektoru Majid Abu Zureiq öz nitqində beynəlxalq elmi əməkdaşlığın inkişaf etdirilməsinin və müxtəlif ölkələrdən olan tədqiqatçılar arasında əlaqələrin genişlənməsinin vacibliyinə toxunub. O, bu tip beynəlxalq tədbirlərin təcrübə mübadiləsi, ortaq araşdırma istiqamətlərinin təyin edilməsi və yeni əməkdaşlıqların qurulması üçün əhəmiyyətli platforma yaratdığını vurğulayıb.
Nümayəndə heyətinin rəhbəri Milud Murad da çıxışında tədbirin elmi-akademik əməkdaşlığın irəliləməsindəki rolundan danışıb. Təşkilat Komitəsinin sədri Hüseyn Əl-Rəbabaa isə tədbirin fərqli elm sahələri arasında əlaqələrin möhkəmləndirilməsi və beynəlxalq elmi dialoqun inkişafı baxımından önəmini qeyd edib.
Sonda BAAU-nun Ərəbşünaslıq Mərkəzinin rəhbəri Ülviyyə Hüseynova konfransın işinə uğurlar diləyib və elmi müzakirələrin yeni əməkdaşlıq imkanları yaradacağına əminliyini bildirib.
Konfrans çərçivəsində tətbiqi və humanitar elmlər arasındakı inteqrasiyanın inkişafı, dayanıqlı inkişafla bağlı aktual problemlər və rəqəmsal transformasiyanın müxtəlif sahələrə təsiri müzakirə edilib. Fərqli ölkələrdən gələn alim və tədqiqatçılar məruzələrlə çıxış edərək öz elmi yanaşmalarını təqdim ediblər və aktual mövzular ətrafında fikir mübadiləsi aparıblar.
Tədbir proqrama uyğun şəkildə növbəti panel iclasları və məruzələrlə davam edib.
