Bakı Ali Neft Məktəbinə (BANM) institusional akkreditasiya şəhadətnaməsi təqdim olunub, məktəb növbəti 5 il üçün akkreditasiya olunub.
Bakı Ali Neft Məktəbində institusional akkreditasiya şəhadətnaməsinin təqdim olunması ilə bağlı xüsusi tədbir təşkil edilib.
Tədbirdə Təhsildə Keyfiyyət Təminatı Agentliyinin (TKTA) İdarə Heyətinin sədri Tural Əhmədov, BANM-in rektoru Elmar Qasımov, həmçinin hər iki qurumun nümayəndələri iştirak edib.
Təhsildə Keyfiyyət Təminatı Agentliyi tərəfindən aparılan qiymətləndirmə prosesinin yekununda Bakı Ali Neft Məktəbi institusional akkreditasiyadan müvəffəqiyyətlə keçib. Bu nəticəyə əsasən ali məktəb növbəti 5 il müddətinə akkreditasiya statusu alıb.
Tədbir zamanı söz alan BANM-in rektoru Elmar Qasımov institusional akkreditasiyanın ali təhsil müəssisəsinin fəaliyyətinin müəyyən keyfiyyət standartlarına cavab verib-vermədiyini müəyyənləşdirmək baxımından böyük rol oynadığını diqqətə çatdırıb.
Rektor əldə edilən nəticənin məktəbin təhsil keyfiyyətini daima artırmaq istiqamətində gördüyü işlərin bir sübutu olduğunu bildirib.
TKTA-nın İdarə Heyətinin sədri Tural Əhmədov öz növbəsində institusional akkreditasiyanın ali təhsil ocaqlarının fəaliyyətinə hərtərəfli qiymət vermək və keyfiyyət təminatı ilə bağlı mexanizmləri gücləndirmək üçün nə qədər önəmli olduğunu qeyd edib.
O, BANM-in bu prosesdən uğurla çıxmasını məktəbin keyfiyyət təminatı sahəsində apardığı ardıcıl və sistemli işin təbii nəticəsi kimi xarakterizə edib.
Tədbirin sonunda Bakı Ali Neft Məktəbinə institusional akkreditasiya şəhadətnaməsi rəsmi şəkildə təqdim olunub.
