Bu gün Azərbaycan Silahlı Qüvvələrinin lokal antiterror tədbirlərində şəhid olan Ülvi Bəhruz oğlu Mikayılovun anım günüdür. Onun şəhadətindən 3 il ötüb.
Ülvi Mikayılov 22 sentyabr 2023-cü il tarixində Azərbaycan Silahlı Qüvvələri tərəfindən keçirilən uğurlu lokal antiterror tədbirləri zamanı həlak olub. Şəhid bu gün anılır.
Ü.Mikayılov 20 avqust 2004-cü ildə Bakı şəhərinin Binəqədi rayonunda dünyaya göz açıb. Orta təhsilini isə Füzuli şəhərindəki 148 saylı tam orta məktəbdə alıb.
O, Azərbaycanın ərazi bütövlüyünün qorunmasında yüksək peşəkarlıq, mərdlik və şücaət nümayiş etdirib. Xidməti vəzifələrini və hərbi hissə qarşısında qoyulan tapşırıqları uğurla yerinə yetirməsi ilə seçilib.
Şəhidin atası bir müsahibəsində oğlunun kiçik yaşlarından hərbi işə böyük maraq göstərdiyini, tez-tez başına beret qoyduğunu bəyan edib:
“Ülvi uşaqlıqdan hərbiyə meyilli idi. Biz onunla hər görüşəndə hərbi xidmətindən fəxrlə danışırdıq. İdmanla məşğul olurdu, gələcək arzusu polis olmaq idi. 44 günlük Vətən müharibəsində qazanılan qələbə onu sonsuz sevindirmişdi. Deyirdi ki, qalib orduda xidmət etmək özü bir fəxrdir”.
Ülvi Mikayılovun son istəyi Füzulidə dəfn edilmək olub. Atası bu barədə deyib:
“Biz Bakıda yaşasaq da, əslən Füzulidənik. Oğlum həmişə deyirdi ki, ən böyük arzusu azad olunmuş torpaqda yaşamaqdır. Biz də onun vəsiyyətini yerinə yetirdik. Ülvini ata-baba torpağında dəfn etdik, ailəlikcə Füzuliyə köçdük. Bu gün biz orada yaşayırıq və övladımızın ruhunun şad olduğunu bilirik”.
Maraqlı faktdır ki, Ülvi Mikayılov 20 avqust tarixində doğulub, 20 sentyabr tarixində isə 20 yaşında həlak olub.
Azərbaycan Prezidenti İlham Əliyevin Sərəncamına əsasən, şəhid “Vətən uğrunda” medalı və 3-cü dərəcəli “Vətənə xidmətə görə” ordeni ilə təltif edilib.
