Bakının Qaradağ rayonu, Ümid qəsəbəsində “Mercedes” markalı yük avtomobili yolkənarında dayanmış “KamAz”a çırpılıb, nəticədə sürücü avtomobil daxilində sıxılı vəziyyətdə qalıb.
Bakı şəhərinin Qaradağ rayonundakı Ümid qəsəbəsi ərazisində yol-nəqliyyat hadisəsi baş verib. Qəza zamanı avtomobil sürücüsü maşının içində sıxılı vəziyyətə düşüb.
Fövqəladə Hallar Nazirliyinin yaydığı məlumata görə, hadisə yerinə Dövlət Yanğından Mühafizə və Xüsusi Riskli Xilasetmə xidmətlərinin əməkdaşları cəlb olunub. Xilasedicilər ilkin olaraq ərazidə vəziyyəti qiymətləndiriblər.
Aparılan araşdırma zamanı bəlli olub ki, “Mercedes” markalı yük maşını yol kənarında dayanmış “KamAz” markalı yük avtomobili ilə toqquşub. Bu toqquşma nəticəsində “Mercedes”in sürücüsü texnikanın içində sıxılı qalıb.
Xüsusi avadanlıqdan istifadə edən xilasedicilər 1971-ci il təvəllüdlü Elşən Firdovsi oğlu Talışovu avtomobildən çıxararaq müvafiq xidmətlərə təhvil veriblər.
Hazırda hadisə ilə bağlı aidiyyəti qurumlar tərəfindən yoxlama aparılır.
