Bakıda 36 yaşlı qadın özünü Prezident Administrasiyasının məsul əməkdaşı kimi təqdim edərək altı nəfərdən 200 min manata yaxın pul almaqda təqsirli bilinib və məhkəmə tərəfindən 6 il həbs cəzasına məhkum edilib.
Bakı Ağır Cinayətlər Məhkəməsi dələduzluq iddiası ilə bağlı 36 yaşlı Nərmin Məhərrəmovaya (soyad şərtidir) münasibətdə hökm oxuyub. Qadın özünü Prezident Administrasiyasının məsul əməkdaşı kimi təqdim edərək altı nəfəri aldadıb.
Məlumata görə, o, müxtəlif bəhanələrlə insanlardan pul yığıb. Vəd etdiyi xidmətlər arasında bunlar olub:
Bu yolla o, ümumilikdə altı nəfərdən 200 min manata yaxın vəsait əldə edib. Zərərçəkmişlərin bir qismi bildirib ki, qadın yüksək vəzifəli şəxslərlə tanışlığı olduğunu deyərək onlarda inam formalaşdırıb.
Araşdırma zamanı məlum olub ki, Nərmin Məhərrəmova əslində Yasamal rayonunda, Şəfayət Mehdiyev küçəsində yerləşən və əvvəllər “Lider TV” kimi tanınan binada fəaliyyət göstərən Azərbaycan Həmrəylik Partiyasında çalışıb.
Aldadıldığını anlayan bir neçə şəxs pullarını geri almaq üçün həmin ünvana gedib. Ancaq nə vəsaiti geri ala biliblər, nə də qadınla əlaqə saxlaya biliblər.
Bundan sonra zərərçəkmişlər polisə müraciət ediblər. Nəticədə Nərmin Məhərrəmova barəsində Cinayət Məcəlləsinin 178.3.2-ci maddəsi (külli miqdarda dələduzluq) ilə cinayət işi başladılıb.
Prosesdə Azərbaycan Həmrəylik Partiyasının sədri Əlisahib Hüseynov ifadə verib. O bildirib ki, Nərmini və onun atasını tanıyır, lakin qadın həmin təşkilatda heç vaxt işə götürülməyib.
Bakı Ağır Cinayətlər Məhkəməsi araşdırılan sübutlar əsasında Nərmin Məhərrəmovanı təqsirli bilib və ona 6 il azadlıqdan məhrum etmə cəzası tətbiq edib.
Bundan əlavə, zərərçəkmişlərdən birinin təqdim etdiyi 143 min manatlıq mülki iddia da təmin olunub. Məhkəmə qərarına əsasən, bu məbləğ Nərmin Məhərrəmovadan tutularaq zərərçəkmişə ödəniləcək.
