Sumqayıtdan Bakıya hərəkət edən ADY qatarında həddindən artıq sərnişin sıxlığı yaranıb, bəzi sərnişinlər yer tapmadığı üçün ayaqyoluna sığınmalı olub.
Bakıda son günlər ictimai nəqliyyatda böyük sıxlıq müşahidə olunur. Metronun müvəqqəti bağlanması və Formula 1 yarışlarının keçirilməsi bu vəziyyətin əsas səbəblərindən sayılır.
Sıxlıq təkcə metro və avtobuslarda deyil, dəmiryol nəqliyyatında da özünü göstərib. Sumqayıtdan Bakıya hərəkət edən Azərbaycan Dəmir Yolları (ADY) qatarlarından birində sərnişin sayının həddən artıq çox olması qeydə alınıb.
Baş verənlərlə bağlı istifadəçilər sosial şəbəkələrdə video paylaşıblar. Görüntülərdə qatarın vaqonlarında sərnişinlərin sayının çoxluğu səbəbindən hərəkət etməyin belə çətinləşdiyi göstərilir.
Videoda diqqəti çəkən məqamlardan biri də odur ki, bəzi sərnişinlər vaqonlarda yer tapmadıqları üçün qatarın ayaqyolu bölməsində dayanmağa məcbur olublar.
