Sentyabrın 24-də Bakının Yasamal və Xəzər rayonlarında elektrik şəbəkələrində təmir və yenidənqurma işləri aparılacaq, bu səbəbdən bir sıra ərazilərdə enerji təchizatında fasilələr yaşanacaq.
Sentyabrın 24-də paytaxtın Yasamal və Xəzər rayonlarında elektrik təsərrüfatında planlı təmir və yenidənqurma tədbirləri həyata keçiriləcək. Bu barədə “Azərişıq” ASC açıqlama yayıb.
Yasamal Rayon Enerji Təchizatı və Satışı İdarəsinin xidmət göstərdiyi ərazidə Transformator Məntəqəsində təmir işləri görüləcək. Bununla bağlı saat 10:00-dan 13:00-dək Arif Mehdiyev, Ələsgər Ələkbərov, Əsəd Əhmədov və Murad Mirzəyev küçələrində, həmçinin Hüseyn Cavid prospektində və İkinci Alatava yaşayış massivinin müəyyən hissəsində elektrik enerjisinin verilməsində kəsintilər olacaq.
Xəzər Rayon Enerji Təchizatı və Satışı İdarəsinin ərazisində isə 6 kV gücündə olan bir sıra ikidövrəli hava xətlərində elektrik naqillərinin dəyişdirilməsi nəzərdə tutulub. Bu işlər çərçivəsində saat 10:00-dan 15:00-dək Mərdəkan qəsəbəsində Almaz İldırım, Hacı Məmmədov, Məmməd Səid Ordubadi və Mirzə Ələkbər Sabir küçələrinin bəzi hissələrində elektrik təchizatı müvəqqəti dayandırılacaq.
“Azərişıq” ASC bildirib ki, aparılan işlər başa çatdıqdan sonra qeyd olunan ərazilərdə yaşayan abonentlər daha keyfiyyətli və fasiləsiz elektrik enerjisi ilə təmin olunacaqlar.
