Sumqayıtda yol hərəkəti qaydalarını pozan, təhlükəli manevrlər edən və səs-küy yaradan motosiklet sürücülərinə qarşı polis reyd keçirib, nəticədə 22 nəfər saxlanılıb.
Sumqayıt şəhərində motosiklet sürücülərinin yol hərəkəti qaydalarını pozması, təhlükəli manevrlər etməsi və icazə verilən normadan artıq səs-küy yaratması hallarının qarşısını almaq üçün polis əməkdaşları xüsusi nəzarət-profilaktik tədbirlər həyata keçirib.
Sumqayıt Şəhər Polis İdarəsinin DYP Şöbəsi və digər xidmət sahələrinin əməkdaşlarının birgə iştirakı ilə şəhərin ayrı-ayrı ərazilərində keçirilən reydlər nəticəsində cəmi 22 motosiklet sürücüsü saxlanılıb.
Aparılan yoxlamalar zamanı saxlanılan sürücülərdən 2 nəfərin narkotik vasitənin təsiri altında motosiklet idarə etdiyi aşkarlanıb. Bu şəxslər barəsində zəruri sənədlər hazırlanaraq baxılmaq üçün məhkəməyə təqdim olunub.
Məhkəmə hər iki sürücünü təqsirli hesab edərək onların hər birinə 15 gün müddətinə inzibati həbs cəzası tətbiq edib.
Saxlanılan digər 20 nəfərin isə sürücülük vəsiqəsi və dövlət qeydiyyat nişanı olmadan motosiklet idarə etdikləri müəyyənləşdirilib. Bu şəxslərə qarşı da qanunvericiliyə əsasən müvafiq inzibati tədbirlər görülüb.
Sumqayıt Şəhər Polis İdarəsi bildirib ki, şəhərdə yol hərəkəti təhlükəsizliyinin təmin olunması və ictimai qaydanın qorunması məqsədilə bu cür nəzarət-profilaktik tədbirlər gələcəkdə də davam etdiriləcək.
