Bakıda fəaliyyət göstərən 10 nömrəli avtobusun uzun intervalla hərəkət etməsindən narazı qalan sərnişinlərin şikayətlərindən sonra "BakuBus" MMC vəziyyətlə bağlı rəsmi açıqlama yayıb.
Paytaxtda işləyən 10 nömrəli avtobus xəttinin sərnişinləri son vaxtlar uzun gözləmə müddətindən şikayətlənirlər. Bakues.az platformasına müraciət edən vətəndaşlar bildirib ki, avtobuslar arasında interval 30-40 dəqiqəyə qədər uzanıb, bu da onların işə gecikməsinə səbəb olub.
Yaranan vəziyyətlə bağlı "BakuBus" MMC-yə sorğu ünvanlanıb. Qurum sərnişinlərin qeyd etdiyi gecikmənin səbəbini açıqlayaraq bunun müəyyən yol məhdudiyyətləri ilə bağlı olduğunu bildirib.
Şirkətdən verilən cavabda bildirilib ki, 22 sentyabr 2026-cı il tarixində baş verən gecikmə şəhərin bəzi küçələrində tətbiq olunan hərəkət məhdudiyyətləri ilə əlaqədar yaranıb. Qurumun açıqlaması tam şəkildə belədir:
"22.09.2026-cı il tarixində "BakuBus" MMC-nin istismarında olan 10 nömrəli müntəzəm marşrut xətti üzrə avtobusların MİDA Yasamal son dayanacaq məntəqəsində müəyyən müddət gözləməsi həmin saatlarda Əbdürrəhim bəy Haqverdiyev və Nazim Hikmət küçələrində tətbiq olunan hərəkət məhdudiyyətləri ilə əlaqədar olub. Yaranmış yol şəraiti nəzərə alınaraq xətt üzrə hərəkətin tənzimlənməsi məqsədilə son dayanacaq məntəqəsində olan avtobusların çıxışı Onlayn Monitorinq Mərkəzinin tənzimləməsinə əsasən dispetçer tərəfindən idarə edilib. Avtobuslar tənzimləmədən sonra müəyyən edilmiş hərəkət qrafikinə uyğun fəaliyyətlərini davam etdiriblər. Sözügedən müddətdə həmin istiqamətdə interval təxminən 15 dəqiqə təşkil edib. Qeyd edək ki, paytaxtda keçirilən Formula 1 Azərbaycan Qran-Prisi ilə əlaqədar tətbiq olunan hərəkət məhdudiyyətləri səbəbindən 10 nömrəli marşrut xəttinin hərəkət sxemində də müvəqqəti dəyişiklik edilib. Dəyişikliyə əsasən, avtobusların "İçərişəhər" metrostansiyası istiqamətində hərəkəti Şeyx Şamil, Lermontov və Bünyad Sərdarov küçələri (son dayanacaq məntəqəsi) ilə təmin edilib".
Şirkətin açıqlamasından göründüyü kimi, gecikmənin əsas səbəbi paytaxtda keçirilən Formula 1 Azərbaycan Qran-Prisi zamanı tətbiq olunan yol məhdudiyyətləri olub. Bu səbəbdən 10 nömrəli marşrutun hərəkət sxemi müvəqqəti olaraq dəyişdirilib və avtobuslar fərqli küçələrdən istifadə edərək "İçərişəhər" metrostansiyasına çatdırılıb.
