Xarici işlər naziri Ceyhun Bayramov BMT Baş Assambleyasının 81-ci sessiyası çərçivəsində İslam Əməkdaşlıq Təşkilatının Cammu və Kəşmir üzrə Təmas Qrupunun iclasında çıxış edərək məsələnin sülh yolu ilə həllinə çağırıb.
Xarici işlər naziri Ceyhun Bayramov BMT Baş Assambleyasının 81-ci sessiyasında iştirakı çərçivəsində İslam Əməkdaşlıq Təşkilatının (İƏT) Cammu və Kəşmir üzrə Təmas Qrupunun keçirdiyi iclasda iştirak edib və çıxış edib. Bu barədə Xarici İşlər Nazirliyi məlumat yayıb.
Çıxışında nazir Bakının mövqeyini bir daha bəyan edərək, Cammu və Kəşmir problemin beynəlxalq hüquq normaları, BMT Nizamnaməsi və Təhlükəsizlik Şurasının aidiyyəti qətnamələri əsasında sülh yolu ilə tənzimlənməsinin vacibliyini önə çəkib.
Bayramov İƏT-in və onun Cammu və Kəşmir üzrə Kontakt Qrupunun bu istiqamətdə göstərdiyi ardıcıl və aktiv fəaliyyəti Azərbaycanın yüksək dəyərləndirdiyini vurğulayıb. O, həmçinin beynəlxalq ictimaiyyətin geniş dairəsinin də bu problemi dünya gündəmində saxlamağa dəstək verməsinin əhəmiyyətinə diqqət çəkib.
Nazirin sözlərinə görə, Cammu və Kəşmir mövzusunun ədalətli və sülh əsaslı şəkildə, həm də tezliklə həll edilməsi Cənubi Asiya regionunda uzunmüddətli sabitlik, sülh və təhlükəsizliyin bərqərar olmasına töhfə verəcək.
Ceyhun Bayramov bölgədə mövcud atəşkəs rejiminin davam etdirilməsinin Hindistan və Pakistan arasındakı əlaqələrin normallaşmasına yol açacağını, bunun isə öz növbəsində regional sülh və sabitlik üçün zəmin yaradacağına ümid bəslədiyini bildirib.
