Uqanda Xalq Müdafiə Qüvvələrinin komandanı Muhozi Kaineruqaba Ankaranın müxalifətçi Fred Kajubi Lumbuyeni ölkəsinə təhvil verməməsini əsas gətirərək Türkiyə ilə hərbi əməkdaşlığı yenidən dayandırdığını bildirib.
Uqanda ordusunun komandanı general Muhozi Kaineruqaba Türkiyə hökumətini müxalifətçi Fred Kajubi Lumbuyeni ekstradisiya etməməkdə ittiham edərək, iki ölkə arasındakı hərbi əlaqələrin dayandırıldığını elan edib. Uqanda ordusunun sözçüsü Kris Magezi açıqlamasında Uqanda Xalq Müdafiə Qüvvələrinin (UPDF) Türkiyə ilə bütün müdafiə və hərbi əməkdaşlığa xitam verdiyini təsdiqləyib.
Bu, iki ölkə arasında qarşılıqlı müdafiə və hərbi əməkdaşlıqla bağlı məsələlər həll olunana qədər qüvvədə qalacaq.
Sözçü Magezi bildirib ki, dayandırma qərarı tərəflər arasındakı problemlər aradan qalxana qədər davam edəcək.
Uqanda hakimiyyətinə qarşı kəskin tənqidləri ilə tanınan Fred Kajubi Lumbuye 2013-cü ildə Türkiyəyə sığınacaq üçün müraciət edib. 2021-ci ildə Türkiyədə saxlanılaraq Uqandaya deportasiya edilən Lumbuye həmin vaxtdan yoxa çıxıb və taleyi məlum deyil.
General Kaineruqaba uzun müddət Lumbuyenin Türkiyədən Uqandaya təhvil verilməsini tələb edib və bu mövzuda Ankara hakimiyyəti ilə dəfələrlə fikir ayrılığına düşüb. Son açıqlamasında da general yenidən Lumbuyenin ölkəsinə qaytarılmasını istəyib.
Kaineruqabanın Türkiyəyə yönəlik sərt çıxışları bu hadisə ilə məhdudlaşmır. General daha əvvəl Ankaradan 1 milyard dollar tələb etmiş, əks halda Türkiyənin Uqandadakı səfirliyini bağlayacağı ilə hədələmişdi.
O, həmçinin Türkiyənin ən gözəl qadınını həyat yoldaşı kimi istədiyini yazmışdı. Bir paylaşımında artıq beş türk qadını ilə evləndiyini bildirən general Türkiyədən gələcək təhdidlərə qarşı mübarizə aparacaqlarını vurğulamışdı.
Kaineruqaba daha sonra Türkiyə vətəndaşlarının Uqandanı tərk etməsi üçün çağırış edərək Lumbuyenin dərhal ölkəsinə təhvil verilməsini yenidən tələb etmişdi. Bu paylaşımlar sonradan sosial mediadan silinib.
Muhozi Kaineruqaba Uqanda Prezidenti Yoveri Museveninin oğlu olmaqla yanaşı, ölkənin gələcək lideri kimi ehtimal olunan varislərdən biri sayılır. Sosial şəbəkələrdəki fəal və qeyri-adi paylaşımlarına görə ona “Twitter generalı” ləqəbi verilib.
