"Fənərbaxça" klubu FİFA-nın tətbiq etdiyi üç transfer pəncərəlik qadağa ilə bağlı açıqlama yayaraq, məsələnin "Sevilya"dan gətirilən Yusif En-Nesirinin transfer haqqı ilə bağlı ödəniş problemindən qaynaqlandığını bildirib.
İstanbul təmsilçisi "Fənərbaxça" FİFA-nın klub üzərinə qoyduğu transfer qadağasının müvəqqəti xarakter daşıdığını açıqlayıb. Klubun rəsmi bəyanatına görə, məsələ futbolçu Yusif En-Nesirinin "Sevilya"dan transferi ilə bağlı ödənişin gecikməsindən irəli gəlib.
Açıqlamada bildirilib ki, En-Nesirinin transferinə görə 2026-cı il aprelin 30-da ödənilməli olan məbləğ vaxtında köçürülməyib. Bunun ardınca "Sevilya" tərəfi FİFA-ya rəsmi müraciət edərək vəziyyəti bildirib.
Nəticədə FİFA "Fənərbaxça"ya üç transfer pəncərəsi müddətinə transfer qadağası tətbiq edib. Klub bu addımın hüquqi əsasının məhz həmin gecikmiş ödəniş olduğunu vurğulayıb.
"Fənərbaxça"nın açıqlamasına əsasən, klubun yeni rəhbərliyi vəzifəyə başladıqdan sonra gecikmiş məbləğin ödənişini icra edib. Bununla belə, FİFA-dakı proseslər çərçivəsində daha bir ödənişin də edilməsi tələb olunub.
Klub bu tələblə bağlı FİFA-nın qərarını gözlədiyini bildirib. Rəsmi mövqeyə görə, tələb olunan növbəti ödəniş sentyabrın 28-də, klubun ilk iş günündə həyata keçiriləcək.
"Fənərbaxça" bildirib ki, FİFA ilə bağlı bürokratik prosedurlar tamamlandıqdan sonra tətbiq olunan transfer qadağası aradan qaldırılacaq. Klub bu prosesin yaxın vaxtlarda başa çatacağını gözlədiyini vurğulayıb.
Bundan əlavə, açıqlamada qeyd olunub ki, əvvəlki dövrlərə aid bütün maliyyə hesabatları və öhdəliklər sentyabrın 27-də keçiriləcək növbəti Baş Assambleyada klub üzvlərinə və ictimaiyyətə təqdim ediləcək.
