25–26 sentyabr tarixlərində Bakıda keçirilən 2-ci Azərbaycan Beynəlxalq İnvestisiya Forumu çərçivəsində "Kritik xammal və qlobal iqtisadi təhlükəsizlik" mövzusunda panel sessiya baş tutub.
25–26 sentyabr tarixlərində Azərbaycan Respublikasının Prezidenti İlham Əliyevin himayəsi altında keçirilən 2-ci Azərbaycan Beynəlxalq İnvestisiya Forumu çərçivəsində "Kritik xammal və qlobal iqtisadi təhlükəsizlik" adlı panel sessiya təşkil edilib.
Tədbirdə Azərbaycan Respublikasının ekologiya və təbii sərvətlər naziri Rəşad İsmayılov, "AzerGold" QSC-nin İdarə Heyətinin sədri Zakir İbrahimov, Asiya İnkişaf Bankının Azərbaycan üzrə direktoru Sunniya Durrani-Camal, eləcə də "Technip Energies", "Limak Holding", "Green Spark" və "Kazakhstan Insulator Plant" şirkətlərinin rəhbər nümayəndələri iştirak edib.
Panel çərçivəsində kritik xammalın qlobal enerji keçidində, yüksək texnologiyalı sənayedə və iqtisadi təhlükəsizlikdə artan strateji rolu müzakirə olunub. Bundan başqa, dayanıqlı təchizat və emal zəncirlərinin qurulması, beynəlxalq əməkdaşlıq imkanları və investisiya perspektivləri barədə fikir mübadiləsi aparılıb.
Çıxış edən ekologiya və təbii sərvətlər naziri Rəşad İsmayılov Azərbaycanın bu sahədəki yanaşmasının uzunmüddətli əməkdaşlığa, resurslardan səmərəli istifadəyə və qarşılıqlı fayda prinsipinə söykəndiyini vurğulayıb. Onun sözlərinə görə, "Azərbaycan 2030" Milli Prioritetləri çərçivəsində dairəvi iqtisadiyyata əsaslanan biznes modellərinin genişləndirilməsi, dövlət-özəl tərəfdaşlığının inkişafı və mineral ehtiyatların səmərəli dövriyyəyə qatılması əsas hədəflər sırasındadır.
Nazir ayrıca Kiçik Qafqaz, Naxçıvan və Balakən-Zaqatala regionlarının kritik mineral potensialı baxımından mühüm əhəmiyyət daşıdığını qeyd edib. O, bu ərazilərdə həyata keçirilən layihələrdə ekoloji tələblərin gözlənilməsinin zəruriliyini də diqqətə çatdırıb.
"AzerGold" QSC-nin İdarə Heyətinin sədri Zakir İbrahimov bildirib ki, kritik minerallar artıq təkcə dağ-mədən sənayesinin deyil, qlobal iqtisadi təhlükəsizliyin də ayrılmaz hissəsinə çevrilib. Onun sözlərinə görə, enerji keçidi, rəqəmsal texnologiyaların yayılması və süni intellektin sürətli inkişafı metallara olan tələbatı artırır, geosiyasi proseslər isə təchizat zəncirlərinin dayanıqlılığı məsələsini daha da aktuallaşdırır.
İbrahimov qeyd edib ki, əsas problem yalnız resursların mövcudluğu deyil, onların hansı yerdə emal oluna biləcəyi və dünya bazarlarına təhlükəsiz şəkildə çatdırılması ilə bağlıdır. O, Azərbaycanın zəngin mineral ehtiyatlarına, güclü enerji-sənaye infrastrukturuna, həmçinin Mərkəzi Asiyanı Avropa və digər qlobal bazarlarla birləşdirən Orta Dəhliz üzərindəki mövqeyinə görə bu sahədə mühüm imkanlara sahib olduğunu vurğulayıb.
Nümunə olaraq Filizçay polimetal yatağını göstərən İbrahimov bu yatağın zəngin sink, qurğuşun və mis ehtiyatlarına malik olduğunu bildirib. Onun sözlərinə görə, belə layihələr Azərbaycanın regional təchizat zəncirlərindəki mövqeyini gücləndirə bilər.
Zakir İbrahimov Ələt Kritik Minerallar Mərkəzinin inkişafı istiqamətində görülən işlərə də toxunub. Onun sözlərinə görə, bu təşəbbüs Azərbaycanın mineral ehtiyatlarını və emal imkanlarını Mərkəzi Asiya resursları ilə birləşdirərək Avropa və digər qlobal bazarlara çıxış imkanlarını genişləndirə bilər.
Beynəlxalq əməkdaşlığın vacibliyini vurğulayan İbrahimov "AzerGold" QSC ilə Birləşmiş Ərəb Əmirliklərinin "International Resources Holding" şirkəti arasında Naxçıvanda həyata keçirilən layihəni nümunə çəkib. O bildirib ki, bu əməkdaşlıq çərçivəsində kritik metalların da daxil olduğu mineral-xammal potensialının araşdırılması və perspektivli faydalı qazıntı yataqlarının müəyyənləşdirilməsi istiqamətində işlər davam etdirilir.
Panel sessiya sual-cavab formatında yekunlaşıb. Müzakirələr zamanı kritik xammalın iqtisadi təhlükəsizlikdəki rolu, dayanıqlı təchizat zəncirlərinin formalaşdırılması, mineral resursların məsuliyyətli istismarı, emal imkanlarının genişləndirilməsi və beynəlxalq əməkdaşlıq mövzuları ətrafında fikir mübadiləsi aparılıb.
