"Azərişıq" ASC-nin nümayəndələri Culfa şəhərində fermer, sahibkar və yerli sakinlərlə görüş keçirib, elektrik şəbəkəsinə qoşulma və xidmət qaydaları barədə məlumat verilib.
"Azərişıq" ASC Prezident İlham Əliyevin tapşırıqlarına uyğun olaraq regionlarda maarifləndirici görüşlərini davam etdirir. Bu tədbirlərdən biri Naxçıvanın Culfa şəhərində keçirilib və ona 30-dək sahibkar, yerli sakin qatılıb.
Görüşün əsas məqsədi fermer, sahibkar və vətəndaşların elektrik şəbəkəsinə qoşulma prosesi, həmçinin elektrik enerjisindən düzgün istifadə qaydaları ilə tanış edilməsi olub.
Görüşdə "Azərişıq" ASC-nin ASAN Xidmətlə İş Departamentinin direktoru İnam Yusifov, Mətbuat və İctimaiyyətlə Əlaqələr İdarəsinin rəisi Vaqif Mustafayev, Naxçıvan Regional Enerji Təchizatı və Satışı İdarəsinin (RETSİ) rəisi Nərman Mahmudov, eləcə də Culfa Rayon İcra Hakimiyyətinin nümayəndəsi Mübariz Möhsünov iştirak edib.
İştirakçılara Prezident İlham Əliyevin tapşırıqları çərçivəsində regionlarda aparılan yenidənqurma və əsaslı təmir işləri barədə ətraflı məlumat verilib. Bildirilib ki, ölkənin bütün bölgələrində yeni güc mərkəzləri və müasir yarımstansiyalar inşa olunur, ən son standartlara cavab verən transformator məntəqələri qurulur, yeni dayaqlar basdırılır və izolyasiyalı xətlər çəkilir.
Görüş zamanı elektron xidmətlər mövzusunda da geniş söhbət aparılıb. Sakinlərə xidmət mərkəzlərinin təklif etdiyi imkanlar, yeni elektrik şəbəkəsinə qoşulma qaydası, texniki şərtlərin alınması və ödəniş prosedurları izah edilib.
Bundan başqa, vətəndaşların tez-tez müraciət etdiyi digər məsələlər də diqqətə çatdırılıb:
Həmçinin ASAN Xidmət mərkəzləri və elektron platformalar vasitəsilə göstərilən bütün xidmətlər barədə ətraflı bilgi paylaşılıb. Vurğulanıb ki, bu imkanlar vətəndaş və sahibkarların müraciətlərinin daha tez və rahat həllinə xidmət edir.
Abonentlərin evdən və ya iş yerindən çıxmadan onlayn qaydada quruma necə müraciət edə biləcəkləri barədə də ətraflı izahat verilib. Görüşdə iştirakçıların sualları cavablandırılıb, onların təklif və tövsiyələri dinlənilərək fikir mübadiləsi aparılıb.
"Azərişıq" ASC-nin belə maarifləndirici görüşləri abonentlərin fasiləsiz və dayanıqlı elektrik enerjisi ilə təmin olunmasına, həmçinin enerji itkilərinin azaldılmasına yönəlib.
