Bakı Şəhər Halqasında Formula 1-in Azərbaycan Qran-Prisinin 10-cu yubiley yarışının açılış mərasimi keçirilib, əsas yarış saat 15:00-da start götürüb.
Bakı Şəhər Halqasında Formula 1 çərçivəsində keçirilən Azərbaycan Qran-Prisinin 10-cu yubiley yarışının təntənəli açılışı olub. Mərasim əsas yarışın başlamasından bir qədər əvvəl təşkil edilib.
Yarış öncəsi Azərbaycan Respublikasının Dövlət Himni səsləndirilib. Himni Azərbaycanın Xalq artisti, dünya şöhrətli tenor Yusif Eyvazov ifa edib.
Himnin ifasından sonra bütün diqqət yenidən trekdəki pilotlara yönəlib. Saat 15:00-da start götürən əsas yarışda pilotlar 51 dövrə ərzində qələbə uğrunda mübarizə aparırlar.
Yarışın sonunda qalib pilot podiumun ən yüksək pilləsinə qalxaraq Azərbaycan Qran-Prisinin əsas kubokunu əldə edəcək.
Qeyd olunub ki, kubokun dizaynında alov təsviri yer alıb. Bu detal Azərbaycanın tarixən “Odlar Yurdu” kimi tanınmasına işarə edir.
Kubokun yan tərəflərində isə Azərbaycan xalçaçılıq sənətindən ilhamlanan ornamentlər əks olunub. Bu şəkildə Formula 1-in sürət və dinamika ruhu Azərbaycanın milli-mədəni irsi ilə birləşdirilərək kubokun dizaynında əks etdirilib.
