Xarici işlər naziri Ceyhun Bayramov ABŞ-ın təşkil etdiyi tədbirdə TRIPP layihəsinin davamlı regional sülhə töhfə verəcəyini bildirib.
BMT Baş Assambleyasının 81-ci sessiyası çərçivəsində keçirilən "Sülh vasitəsilə rifah: Trans-Xəzər ticarət marşrutu və TRIPP-ə investisiya" adlı tədbirdə Azərbaycanın xarici işlər naziri Ceyhun Bayramov çıxış edib. Tədbir ABŞ hökuməti tərəfindən təşkil olunub. Bu barədə Xarici İşlər Nazirliyi məlumat yayıb.
Çıxışında nazir Azərbaycanın daha güclü regional əlaqələr qurmaq baxışını önə çəkib, bunun iqtisadi artım, dayanıqlı təchizat zəncirləri və yeni investisiya imkanları üçün hərəkətverici qüvvə olduğunu vurğulayıb. Tədbirdə həmçinin sülh quruculuğu ilə rifahı birləşdirən layihə kimi TRIPP-ə xüsusi diqqət ayrılıb.
Tarixi Vaşinqton Sammitinin əsas nəticələrindən biri sayılan TRIPP Azərbaycanın əsas ərazisi ilə Naxçıvan Muxtar Respublikası arasında maneəsiz multimodal əlaqə yaradacaq. Layihənin daha geniş koordinasiyanı gücləndirəcəyi və davamlı regional sülhə töhfə verəcəyi bildirilib. Nazir bu prosesdə göstərdiyi dəstəyə görə ABŞ-a minnətdarlığını ifadə edib.
Bayramov Bakı Limanı və Ələt Azad İqtisadi Zonası əsasında formalaşan inteqrasiya olunmuş nəqliyyat-logistika qovşağına Azərbaycanın davamlı investisiya qoyduğunu diqqətə çatdırıb. O, rəqəmsallaşmanın, sadələşdirilmiş logistika və gömrük prosedurlarının, habelə tərəfdaşlar arasında əlaqələndirilmiş fəaliyyətin əhəmiyyətini vurğulayıb.
Nazir xüsusilə Qazaxıstan, Türkiyə və Gürcüstanla aparılan uğurlu koordinasiya yol xəritələrini nümunə kimi göstərib.
