Sentyabrın 17-də Xızı rayonunda "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı" çərçivəsində görülən işlərə dair monitorinq təşkil olunub.
Tədbir zamanı proqram üzrə Xızı rayonunda həyata keçirilən işlərin icra vəziyyəti yerində araşdırılıb. Monitorinqdə dövlət qurumlarının nümayəndələri ilə yanaşı yerli sahibkarlar da iştirak ediblər.
Görüşdə Azərbaycan Respublikası Prezidentinin Administrasiyasının Ərazi-təşkilat məsələləri şöbəsinin sektor müdiri Habil Əzənmədov, Xızı Rayon İcra Hakimiyyəti başçısı Xəzər Aslanov və Kənd Təsərrüfatı Nazirliyi yanında Aqrar Xidmətlər Agentliyinin sədr müavini Elməddin Namazov iştirak ediblər. Onlara bu məqsədlə formalaşdırılmış rayon qərargahının üzvləri, müvafiq qurumların nümayəndələri qoşulublar.
Xəzər Aslanov toplantıda Dövlət Proqramı çərçivəsində Xızı rayonu üzrə artıq görülmüş işlər və qarşıda duran vəzifələr haqqında geniş izahat verib. O, proqramın icrasında əldə olunan nəticələri və planlaşdırılan növbəti addımları diqqətə çatdırıb.
Monitorinqin davamında rayon ərazisindəki kənd təsərrüfatı obyektlərinə baxış təşkil olunub. Məqsəd bu sahədə görülən konkret işlərlə bilavasitə tanış olmaq idi.
"Giləzi Quşçuluq" MMC-də aparılan iş prosesi ilə bağlı ətraflı məlumat verilib. Şirkətdə yumurta və quş əti istehsalının artırılması üçün yeni fermaların inşasına dair planlar açıqlanıb.
Sahə baxışları zamanı təsərrüfatlarda cari vəziyyət, planlaşdırılan tədbirlərin icra prosesi və yaranan çətinliklər müzakirəyə çıxarılıb. Bundan başqa, sahibkarların irəli sürdüyü təkliflər də dinlənilib.
Bu monitorinq Dövlət Proqramının Xızı rayonunda tətbiqi ilə bağlı görülən işlərin real mənzərəsinin öyrənilməsinə və gələcəkdə qarşıya çıxa biləcək məsələlərin əvvəlcədən aşkarlanmasına xidmət edib.
Rayonda aparılan maarifləndirmə fəaliyyəti nəticəsində Dövlət Proqramı çərçivəsində Xızıda əlavə bir təşəbbüs təklif olunub. Hazırda bu təşəbbüsün həyata keçirilməsi istiqamətində zəruri tədbirlər görülür.
