Ağdam Muğam Mərkəzində Azərbaycanın Milli Qəhrəmanı Natiq Qasımova həsr olunmuş və süni intellekt texnologiyaları ilə hazırlanmış “Düşmənə qarşı tək” qısametrajlı filminin təqdimatı keçirilib.
Ağdam Rayon İcra Hakimiyyətinin təşkilatçılığı ilə keçirilən tədbirdə Milli Qəhrəman Natiq Qasımovun həyatından bəhs edən qısametrajlı film ictimaiyyətə təqdim olunub. Filmin hazırlanmasında süni intellekt texnologiyalarından istifadə edilib.
Tədbirdə Ağdam Rayon İcra Hakimiyyətinin başçısı Vaqif Həsənov, aparat əməkdaşları, Milli Məclisin deputatı Bəxtiyar Əliyev, Yeni Azərbaycan Partiyası Ağdam rayon təşkilatının sədri Mansur Quliyev iştirak edib. Onlara “SOY Production” şirkətinin və layihənin rəhbəri, Əməkdar artist Dilarə Əliyeva, filmin yaradıcı heyəti, Milli Qəhrəmanın ailə üzvləri, müxtəlif idarə və müəssisələrin rəhbərləri, şəhid ailələri, qazilər və digər ictimaiyyət nümayəndələri qoşulub.
Mərasim Azərbaycan Respublikasının Dövlət Himni ilə açılıb, ardınca Ümummilli lider Heydər Əliyevin, Milli Qəhrəman Natiq Qasımovun və torpaqların bütövlüyü uğrunda həlak olan bütün Vətən övladlarının xatirəsi bir dəqiqəlik sükutla anılıb. Bundan sonra film iştirakçılara nümayiş etdirilib.
Vaqif Həsənov çıxışında Prezident İlham Əliyevin rəhbərliyi altında şəhidlərin və milli qəhrəmanların xatirəsinin daim əziz tutulduğunu, onların qəhrəmanlıq nümunələrinin gələcək nəsillərə ötürülməsinə xüsusi əhəmiyyət verildiyini vurğulayıb. O, Natiq Qasımovun döyüş yolunun gənclər üçün nümunə olduğunu bildirib və filmin ərsəyə gəlməsində iştirak edən yaradıcı qrupa təşəkkürünü çatdırıb.
Öz növbəsində Bəxtiyar Əliyev filmdə süni intellekt texnologiyalarının tətbiqini önəmli yenilik adlandırıb. Onun sözlərinə görə, müasir texnoloji həllər tarixi hadisələrin və qəhrəmanların bioqrafiyalarının auditoriyaya daha təsirli şəkildə çatdırılmasına imkan yaradır.
Dilarə Əliyeva bildirib ki, filmin məhz Ağdamda təqdim olunması onlar üçün ayrıca əhəmiyyət kəsb edir. O əlavə edib ki, süni intellekt vasitəsilə çəkilmiş bu film şirkətin bu formatdakı üçüncü layihəsidir.
Filmin əsas məqsədi Milli Qəhrəman Natiq Qasımovun həyatını, qəhrəmanlığını və Vətənə bağlılığını tamaşaçılara çatdırmaqdır.
Dilarə Əliyeva layihəyə göstərdiyi dəstəyə görə Bakı Media Mərkəzinə və onun rəhbəri Arzu Əliyevaya, həmçinin təqdimatın təşkilinə görə Ağdam Rayon İcra Hakimiyyətinə minnətdarlığını bildirib.
Tədbirin sonunda Milli Qəhrəmanın qardaşı Nofəl Qasımov çıxış edərək ailəsinə göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya təşəkkürünü bildirib.
