Bakıda keçiriləcək “Formula-1 Azərbaycan Qran-Prisi 2026” yarışı ilə bağlı şəhərin mərkəzi hissəsindəki bir sıra parklanma məntəqələrinin fəaliyyəti müvəqqəti olaraq dayandırılacaq.
Bakıda “Formula-1 Azərbaycan Qran-Prisi 2026” yarışının keçirilməsi ilə əlaqədar paytaxtın mərkəzi küçələrində yerləşən bəzi parklanma yerlərində hərəkət məhdudlaşdırılacaq. Bu barədə Azərbaycan Yerüstü Nəqliyyat Agentliyi (AYNA) məlumat yayıb.
Agentliyin bildirdiyinə görə, qadağa sentyabrın 20-dən 29-dək qüvvədə olacaq. Həmin müddət ərzində göstərilən ərazilərdə avtomobil sürücülərinin nəqliyyat vasitələrini saxlaması mümkün olmayacaq.
AYNA sürücülərə tövsiyə edib ki, avtomobillərini park edərkən ətrafdakı parklanma nişanlarına diqqətlə yanaşsınlar. Məhdudiyyət qoyulmuş ərazilərdə nəqliyyat vasitəsinin saxlanılmaması xüsusi vurğulanıb.
