Xalq artisti Alim Qasımov və müğənni Üzeyir Mehdizadə təqdim etdikləri yeni duetə gələn tənqidlərə münasibət bildirib.
Xalq artisti Alim Qasımov və müğənni Üzeyir Mehdizadə ötən gün ictimaiyyətə yeni duet təqdim edib. Mahnı yayımlandıqdan sonra sosial şəbəkələrdə fərqli reaksiyalar yaranıb, bir sıra istifadəçilər əsəri tənqid edib.
Tənqidlərə cavab olaraq Alim Qasımov News.24-ə açıqlama verib. O, hər kəsin mahnını öz zövqü və əhvali-ruhiyyəsinə uyğun qarşılaya biləcəyini vurğulayıb.
“Hər kəsə hörmətim var. Kim tənqid edirsə, özü bilər. Bəyənən də var olsun. Artıq bu güllə ürəkdən atılıb, onu arxaya qaytara bilmərik. Bu mahnı ürəkdən gələn bir şeydir və mənim də xoşuma gəlib. Kim bəyənmirsə, Allah işlərini avand etsin. Hər kəsin öz işidir”
Xalq artisti mahnının mətni və Üzeyir Mehdizadə ilə birgə işi haqqında da fikirlərini bölüşüb. Onun sözlərinə görə, bu əməkdaşlıq təsadüfi deyil və məqsədli şəkildə qurulub.
“Mahnının sözləri mənim könlümə yatdı. Həm də Üzeyir bizim qardaşımızdır. Mən də istədim ki, muğamı bir az gəncləşdirim”
Beləliklə, Alim Qasımov yeni layihənin əsas məqsədinin muğam sənətinə müasir çalarlar qatmaq olduğunu bildirib.
