Milli Məclisin deputatı Vasif Qafarov bildirib ki, 2023-cü il 19-20 sentyabr tarixlərində keçirilmiş antiterror tədbirləri Azərbaycanın dövlətçilik tarixində mühüm dönüş nöqtəsi olub.
20 Sentyabr tarixi təkcə antiterror əməliyyatının ildönümü kimi deyil, həm də Prezident İlham Əliyevin uzunmüddətli dövlətçilik xəttinin nəticəsi kimi qiymətləndirilir. Bu fikri Milli Məclisin deputatı Vasif Qafarov açıqlamasında bildirib.
Deputatın sözlərinə görə, 2023-cü ilin 19-20 sentyabr tarixlərində keçirilmiş lokal antiterror tədbirləri ölkənin dövlətçilik tarixində mühüm dönüş nöqtəsi olub.
Əməliyyat nəticəsində ölkəmizin bütün ərazisində dövlət suverenliyi və Konstitusiya quruluşu tam bərpa edildi, uzun illər Azərbaycan ərazisində mövcud olmuş separatizmə və separatçı idarəçiliyə son qoyuldu. Bu tarixi nəticənin arxasında isə Prezident, Müzəffər Ali Baş Komandan İlham Əliyevin illər ərzində həyata keçirdiyi məqsədyönlü və ardıcıl dövlət siyasəti dayanırdı. İlham Əliyevin siyasi iradəsi ilə Azərbaycan əvvəlcə iqtisadi və hərbi potensialını gücləndirdi, daha sonra 2020-ci ildə ərazi bütövlüyünün böyük hissəsini bərpa etdi. Lakin dövlət başçısının müəyyən etdiyi strategiyanın əsas hədəflərindən biri Azərbaycanın bütün ərazisində suverenliyin təmin olunması idi. 2023-cü ilin sentyabrında bu məqsəd də reallaşdı.
Qafarov qeyd edib ki, Prezident İlham Əliyevin rəhbərliyi və qətiyyətli siyasi qərarı sayəsində Azərbaycan Ordusu qarşısına qoyulan tapşırıqları qısa müddət ərzində icra edib, bununla da dövlət hakimiyyəti bütün ərazidə bərpa olunub.
Prezidentin öz çıxışında da qeyd etdiyi kimi, əvvəlki addımların hər biri sonrakı mərhələnin məntiqi davamı olub. Bu prosesin siyasi nəticəsi separatçı qurumun fəaliyyətinin dayandırılması ilə də özünü göstərdi. Beləliklə, Azərbaycan ərazisində dövlət hakimiyyətinə alternativ qanunsuz idarəçilik modelinin mövcudluğu aradan qalxdı. Prezident İlham Əliyevin rəhbərliyi ilə həyata keçirilən siyasət nəticəsində Azərbaycan öz milli maraqlarını, ərazi bütövlüyünü və suveren hüquqlarını praktiki olaraq təmin etmiş oldu.
Deputat bildirib ki, 2020-ci il Zəfərindən 2023-cü ilədək atılan ardıcıl addımlar sayəsində Azərbaycan əvvəlcə ərazi bütövlüyünü, sonra isə dövlət suverenliyini tam şəkildə bərpa edib.
Bu, Azərbaycan dövlətinin öz milli maraqlarını qorumaq və strateji məqsədlərinə çatmaq istiqamətində siyasi iradəsinin mühüm göstəricisidir. Bu gün əsas məsələ əldə edilmiş tarixi nəticələri qorumaq və onları davamlı inkişafla möhkəmləndirməkdir. Qarabağ və Şərqi Zəngəzurun bərpası, Böyük Qayıdış və həmin ərazilərin ölkənin vahid inkişaf məkanına inteqrasiyası Prezident İlham Əliyevin müəyyən etdiyi dövlətçilik xəttinin növbəti mərhələləridir. 20 Sentyabrın əsas mesajı odur ki, suverenlik yalnız bərpa edilən tarixi nailiyyət deyil, hər gün qorunmalı və gələcək nəsillərə daha güclü dövlət şəklində ötürülməli milli sərvətdir.
