Azərbaycan Ordusunun Baş Qərargah rəisi general-polkovnik Kərim Vəliyev ölkədə səfərdə olan Türkiyənin Beynəlxalq Müştərək Strateji Komandanlığının rəhbəri general-polkovnik Sebahattin Kılınç ilə görüşüb.
Azərbaycan müdafiə nazirinin birinci müavini, Baş Qərargah rəisi general-polkovnik Kərim Vəliyev Türkiyə Baş Qərargahının Beynəlxalq Müştərək Strateji Komandanlığına rəhbərlik edən general-polkovnik Sebahattin Kılınçla görüş keçirib. Qonaq hazırda Azərbaycanda səfərdədir.
Görüş zamanı Kərim Vəliyev Azərbaycan ilə Türkiyə arasındakı əlaqələrin tarixən formalaşmış dostluq, qardaşlıq və strateji tərəfdaşlıq dəyərlərinə söykəndiyini vurğulayıb.
Tərəflər iki ölkənin hərbçilərinin birgə iştirak etdiyi təlimlərin əhəmiyyətindən danışıblar. Bildirilib ki, bu cür tədbirlər şəxsi heyətin peşəkarlıq səviyyəsinin artmasına, təcrübə mübadiləsinin genişlənməsinə və hərbi əməkdaşlığın daha da güclənməsinə əhəmiyyətli dəstək olur.
Görüş çərçivəsində tərəflər hərbi sahə, hərbi təhsil, hərbi-texniki əməkdaşlıq, regional təhlükəsizlik və başqa ortaq maraq kəsb edən bir sıra məsələləri də ətraflı müzakirə ediblər.
