Ukraynalı mütəxəssis Yuri Maksimov "Araz-Naxçıvan" klubunun yeni baş məşqçisi təyin olunacaq. 57 yaşlı mütəxəssis bu məqsədlə artıq Bakıya gəlib.
Ukraynalı mütəxəssis Yuri Maksimovun "Araz-Naxçıvan" komandasına baş məşqçi təyin ediləcəyi məlum olub. 57 yaşlı mütəxəssis hazırda Bakı şəhərindədir və yaxın günlərdə klubla müqavilə imzalaması gözlənilir.
Yuri Maksimov Azərbaycan futbol ictimaiyyətinə yad şəxs deyil. O, "Araz-Naxçıvan"ın faktiki sahibi hesab olunan Zaur Axundovla birlikdə 2017-2018-ci illərdə "Keşlə" klubunda çalışıb və həmin komandaya baş məşqçi qismində Azərbaycan Kubokunu qazandırıb.
"Araz-Naxçıvan" cari mövsümdə Azərbaycan Premyer Liqasında oynadığı 6 qarşılaşmadan cəmi 2 xal toplayaraq turnir cədvəlinin sonuncu, 12-ci pilləsində qərarlaşıb. Zəif nəticələr fonunda klub rəhbərliyi bir gün əvvəl baş məşqçi Cavid Hüseynovu vəzifəsindən azad edib.
Ukraynalı mütəxəssis fəaliyyəti boyunca "Dnepr-1", "Krivbass", "Taraz" kimi klubları çalışdırıb. Onun ən son çalışdığı komanda isə 2025-ci ilin yayında ayrıldığı "Vorskla" olub.
Maksimov 2019/20 mövsümündə Poltava təmsilçisini Ukrayna Kubokunun finalına çıxarıb.
Qeyd olunmalıdır ki, "Araz-Naxçıvan"ı 2026-cı ilin yanvar-may aylarında başqa bir ukraynalı mütəxəssis - Andrey Demçenko çalışdırıb.
