27 Sentyabr Anım Günü ilə bağlı Suraxanı rayonunun Zığ qəsəbəsindəki Bahar yaşayış sahəsində ağacəkmə aksiyası və rəsm sərgisi təşkil olunub.
Suraxanı rayonunun Zığ qəsəbəsi, Bahar yaşayış sahəsində 27 Sentyabr Anım Günü münasibətilə ağacəkmə aksiyası keçirilib. Tədbir "Qeyd-Sosial Maarifləndirmə" İctimai Birliyinin təşkilatçılığı ilə həyata keçirilib və eyni zamanda rəsm sərgisi də nümayiş etdirilib.
Aksiyada Suraxanı Rayon İcra Hakimiyyətinin başçısı Adil Əliyev, Yeni Azərbaycan Partiyası Suraxanı Rayon Təşkilatının sədri Vüqar Seyidov və Milli Məclisin deputatı Qaya Məmmədov iştirak edib. Onlara rayonun hüquq-mühafizə qurumlarının rəhbərləri, İcra Hakimiyyəti başçısının müavinləri, Aparat əməkdaşları da qoşulub.
Tədbirdə həmçinin "Qeyd-Sosial Maarifləndirmə" İctimai Birliyinin məsul şəxsləri, şəhid ailələri və müharibə iştirakçıları yer alıb. İdarə, müəssisə və təşkilat rəhbərləri ilə yanaşı, ictimaiyyət nümayəndələri də aksiyaya qoşulub.
Ağacəkmə aksiyası zamanı ərazidə cəmi 750 ədəd sərv ağacı basdırılıb. Bu tədbirin əsas məqsədi Vətən uğrunda həlak olmuş şəhidlərin xatirəsini ehtiramla yad etmək və onların qəhrəmanlığını gələcək nəsillərə çatdırmaq olub.
Bununla yanaşı, aksiya ətraf mühitin mühafizəsinə töhfə vermək və rayon ərazisində yaşıllıqların çoxaldılması məqsədini də daşıyıb.
Tədbir çərçivəsində keçirilən rəsm sərgisində Vətən müharibəsi, qəhrəmanlıq, vətənpərvərlik mövzularında işlər nümayiş etdirilib. Şəhidlərin xatirəsinə həsr olunmuş rəsmlər də sərginin əsas hissəsini təşkil edib.
Sərgi tədbir iştirakçıları tərəfindən böyük maraqla qarşılanıb. Nümayiş olunan əsərlər vasitəsilə xalqın Vətən müharibəsində göstərdiyi birlik, əzm və qəhrəmanlıq ruhu bir daha xatırladılıb.
