DİN Bakıda Formula-1 zamanı hərəkət qaydalarını açıqladı

2026-cı il sentyabrın 23-dən 26-dək Bakı şəhərində “Formula-1 Qatar Airways Azərbaycan Qran Pri” yarışı keçiriləcək. Bu tədbirlə əlaqədar paytaxtda müəyyən nəqliyyat məhdudiyyətləri tətbiq olunacaq.

Daxili İşlər Nazirliyinin Mətbuat xidməti bildirib ki, məhdudiyyətlərin tətbiq olunduğu müddətdə polis əməkdaşları gücləndirilmiş iş rejimində xidmət göstərəcək. Bunun məqsədi sürücü və piyadaların mənzil başına təhlükəsiz çatmasını, nəqliyyat hərəkətinin fasiləsiz davam etməsini, həmçinin yarışın keçirildiyi ərazidə və “Fan” zonalarında ictimai asayişi təmin etməkdir.

Sürücülərə tövsiyələr verilib

DİN-in müraciətində qeyd olunub ki, həmin günlərdə paytaxt sakinlərinə və sürücülərə bir sıra tövsiyələrə əməl etmək məsləhət görülür:

• Mümkün qədər ictimai nəqliyyatdan istifadəyə üstünlük vermək;
• Yollarda nizamlayıcı funksiyasını yerinə yetirən polis əməkdaşlarının işarələrinə dəqiq riayət etmək;
• Səyahətləri əvvəlcədən planlaşdırarkən məhdudiyyət tətbiq olunan küçə və prospektlər əvəzinə alternativ yollardan istifadə etmək.