Ucar rayonunda idarəetməni itirən BMW markalı avtomobil suvarma kanalına aşıb, nəticədə sərnişin xəsarət alıb.
Ucar rayonunda avtomobil qəzası baş verib, hadisə nəticəsində bir nəfər xəsarət alaraq xəstəxanaya çatdırılıb.
Qəza Bakı–Qazax magistral yolunun Qazıqumlaq kəndi ərazisindən keçən hissəsində qeydə alınıb. Bərdə şəhər sakini, 1988-ci il təvəllüdlü Mehman Mehman oğlu Məmmədovun sükan arxasında olduğu BMW markalı minik avtomobili idarəetmədən çıxıb.
Avtomobil yolun kənarındakı suvarma kanalına aşıb. Qəza zamanı sürücünün avtomobilində sərnişin qismində olan həmyerlisi, 1985-ci il təvəllüdlü Roman Zakir oğlu Əsgərov müxtəlif bədən xəsarətləri alıb.
Yaralı sərnişin təcili olaraq Ucar Rayon Mərkəzi Xəstəxanasına çatdırılıb. Hadisə ilə bağlı hazırda müvafiq araşdırma aparılır.
