18 sentyabr Milli Musiqi Günü münasibətilə Azərbaycan Hava Yolları və Azərbaycan Milli Konservatoriyası birgə təşkilatçılıqla "Səmanın ritmi" adlı musiqi müsabiqəsi keçirib.
18 sentyabr Milli Musiqi Günü münasibətilə Azərbaycan Hava Yolları (AZAL) və Azərbaycan Milli Konservatoriyası birgə layihə çərçivəsində "Səmanın ritmi" adlı musiqi müsabiqəsi təşkil edib. Bu barədə məlumat Azərbaycan Hava Yolları QSC-nin Mətbuat xidməti tərəfindən yayılıb.
Layihənin məqsədi aviaşirkətin uçuşdaxili musiqi repertuarını yeniləmək və AZAL-ın brend kimliyini əks etdirən orijinal instrumental əsərlər hazırlamaq olub. Müsabiqəyə Azərbaycan Milli Konservatoriyasının 7 tələbəsi qatılıb və ümumilikdə 21 kompozisiya təqdim edilib.
Təqdim olunan əsərlər bəstəkarlardan və Azərbaycan Hava Yollarının rəhbər heyəti üzvlərindən ibarət münsiflər heyəti tərəfindən dəyərləndirilib. Qiymətləndirmə nəticəsində ən yüksək bal toplayan üç tələbə birinci, ikinci və üçüncü yerlərə layiq görülərək mükafatlandırılıb.
Münsiflər heyətinin tərkibinə Azərbaycan Milli Konservatoriyasının "Dirijorluq" kafedrasının müdiri, sənətşünaslıq üzrə fəlsəfə doktoru, bəstəkar Pikə Axundova-Talıblı, "Populyar musiqi və caz ifaçılığı" kafedrasının dosenti, Əməkdar incəsənət xadimi, bəstəkar Vaqif Gərayzadə və həmin kafedranın müəllimi, Xalq artisti, caz bəstəkarı Salman Qənbərov daxil olub. Müstəqil ekspert qismində isə Bəstəkarlar İttifaqının nümayəndəsi, Əməkdar artist, bəstəkar Vüqar Camalzadə iştirak edib.
Müsabiqədə seçilmiş üç kompozisiyanın yaxın aylarda AZAL-ın uçuşlarında istifadə olunması planlaşdırılır. Bu əsərlər sərnişinlərin təyyarəyə minərkən qarşılanması və yola salınması zamanı, həmçinin uçuş zamanı əyləncə sistemində fon musiqisi kimi səslənəcək.
"Səmanın ritmi" layihəsi gənc musiqiçilərə öz yaradıcılıq imkanlarını nümayiş etdirmək və əsərlərini daha geniş auditoriyaya çatdırmaq şansı verir. Azərbaycan Hava Yolları ilə Azərbaycan Milli Konservatoriyası arasındakı bu əməkdaşlıq nəticəsində yaranan kompozisiyalar sərnişinlərin səyahət təcrübəsinə yeni musiqi ovqatı gətirəcək.
