"Azərişıq" ASC-nin sədri Vüqar Əhmədov 2026-cı il sentyabrın 18-də Ağdamda Füzuli və Xocavənddən olan sakinlərlə görüş keçirib.
Prezident İlham Əliyevin vətəndaşların şəhər və rayonlarda qəbulunun təşkili ilə bağlı tapşırığına uyğun olaraq, "Azərişıq" ASC regionlarda yaşayanlarla mütəmadi görüşlər keçirir. Bu çərçivədə mərkəzi icra hakimiyyəti orqanlarının rəhbərləri üçün müəyyən edilmiş qəbul cədvəlinə uyğun tədbir baş tutub.
"Azərişıq" ASC-nin sədri Vüqar Əhmədov 2026-cı il sentyabrın 18-də Ağdam Regional Rəqəmsal İdarəetmə Mərkəzi və Təlim-Tədris Kompleksinin inzibati binasında Ağdam, Füzuli və Xocavənd rayonlarının sakinləri ilə görüşüb.
Görüş zamanı qurumun fəaliyyət sahəsinə aid olan suallar cavablandırılıb, bir sıra problemlərin yerindəcə aradan qaldırılması üçün addımlar atılıb. Daha ətraflı araşdırma tələb edən mövzular üzrə isə yazılı müraciətlər qeydə alınıb və müvafiq şöbələrə göndərilib ki, məsələlər sonradan həll olunsun.
Ağdam, Füzuli və Xocavənd sakinləri regionlardakı elektrik şəbəkələrinin yenidən qurulması istiqamətində görülən işlərdən məmnunluqlarını dilə gətiriblər. Onlar bu diqqət və qayğıya görə Prezident İlham Əliyevə təşəkkürlərini bildiriblər.
"Azərişıq" ASC-nin regionlarda apardığı yenidənqurma və maarifləndirmə tədbirlərinin, o cümlədən vətəndaşlarla keçirilən bu cür görüşlərin məqsədi abonentlərin fasiləsiz elektrik enerjisi ilə təmin olunmasını gücləndirmək, həmçinin elektrik enerjisi itkilərini minimuma endirməkdir.
