Prezident İlham Əliyev Milli Məclisin 2026-cı il iyulun 14-də qəbul etdiyi Vergi Məcəlləsi və digər qanunlarda dəyişiklik edən sənədi imzalamayaraq geri qaytarıb. Bu addımın səbəbləri Milli Məclisin İqtisadi siyasət, sənaye və sahibkarlıq komitəsinin iclasında izah olunub.
Prezident İlham Əliyevin Milli Məclisin 2026-cı il iyulun 14-də qəbul etdiyi "Azərbaycan Respublikasının Vergi Məcəlləsində, Azərbaycan Respublikasının Miqrasiya Məcəlləsində, 'Sosial sığorta haqqında', 'Gömrük tarifi haqqında', 'Lisenziyalar və icazələr haqqında' və 'Dövlət satınalmaları haqqında' Azərbaycan Respublikasının qanunlarında dəyişiklik edilməsi barədə" qanunu imzalamadan geri qaytarmasının səbəbləri Milli Məclisin İqtisadi siyasət, sənaye və sahibkarlıq komitəsinin iclasında müzakirə olunub.
Komitənin sədri Azər Əmiraslanov bildirib ki, dövlət başçısı innovasiya ekosistemi üzrə dəstək və stimullaşdırıcı mexanizmlərin təkmilləşdirilməsi üçün qanuna bir sıra mütərəqqi dəyişiklik təklif edib.
Yeni redaksiyada sənədin hədəfləri saxlanılır. Əsas məqsəd ölkədə innovativ iqtisadiyyatın inkişafını sürətləndirmək və bu sahəyə özəl investisiyaların cəlbini stimullaşdırmaqdır. Prezidentin təklifləri qanunun ilkin məqsədini qoruyaraq, tətbiq mexanizmlərini təkmilləşdirməyə yönəlib. Nəticədə innovativ fəaliyyətə dövlət dəstəyi daha hədəfli və nəticəyönümlü xarakter alacaq.
Rəqəmsal İnkişaf və Nəqliyyat nazirinin müavini Elmin Məmmədova bildirib ki, sənəddə rəqəmsal iqtisadiyyatın, İKT-nin, innovasiya ekosisteminin və startapların inkişafını yeni mərhələyə çıxaracaq genişmiqyaslı təkliflər var. İslahat dövlət payı 51 faizdən aşağı olan qeyri-dövlət texnologiya subyektlərini əhatə edərək ölkənin texnoloji tərəqqisini sürətləndirməyi nəzərdə tutur.
Bildirilib ki, iri sahibkarlıq subyektlərinin böyük vergi güzəştlərindən yararlana bilməsi üçün onların ümumi gəlirlərində ixracın xüsusi çəkiyə malik olması, eyni zamanda əldə olunan vəsaitlərin yerli banklara gətirilməsi şərti müəyyənləşdirilib. Yeni rejim 2027-ci ilin yanvarından etibarən şəhadətnamə alan rezidentlərə tətbiq ediləcək, mövcud rezidentlər isə hazırkı hüquqi statusları çərçivəsində fəaliyyətlərini davam etdirə biləcək.
Qeyd olunub ki, təkliflər Azərbaycanın neft-qaz sektorundan asılılığının azaldılmasına, intellektual kapitalın ölkəyə cəlbinə və yerli innovativ brendlərin dünya bazarına çıxışının genişləndirilməsinə şərait yaradacaq.
İqtisadiyyat nazirinin birinci müavini Elnur Əliyev sənəddəki güzəştlərin vahid sistem şəklində təqdim olunduğunu vurğulayıb və bu güzəştlərin uzunmüddətli xarakter daşımasının investisiya cəlbediciliyi və rəqabət qabiliyyəti baxımından əhəmiyyətini qeyd edib. Dövlət Vergi Xidmətinin rəis müavini Samirə Musayeva isə təklif olunan vergi təşviqlərinin subyektləri və əhatə dairəsi barədə məlumat verib.
İclasın sonunda yenilənmiş qanunun Prezidentin təklif etdiyi dəyişikliklərlə qəbul edilməsi məqsədəuyğun hesab olunub və müvafiq qərar komitə üzvləri tərəfindən yekdilliklə dəstəklənib.
