ABŞ-nin maliyyə naziri Skott Bessent bildirib ki, İran aviaşirkətləri sentyabrın 23-dən dünya miqyasında uçuşlarını dayandırmalı olacaq.
ABŞ-nin maliyyə naziri Skott Bessent açıqlayıb ki, İran aviaşirkətləri sentyabrın 23-dən başlayaraq dünyanın heç bir nöqtəsində uçuş həyata keçirə bilməyəcək. O, bu barədə CNBC televiziyasına müsahibəsində danışıb.
Nazir bildirib ki, İran təyyarələri hər hansı ölkəyə eniş etsə belə, onlara nə yanacaq, nə də digər aeroport xidmətləri göstəriləcək. Bundan əlavə, həmin aviaşirkətlərin bilet satışına da icazə verilməyəcək.
“Bütün İran aviaşirkətləri sentyabrın 23-də dünya miqyasında fəaliyyətlərini dayandıracaqlar. Bilirsinizmi, bunu necə edəcəyik? Onlar eniş etdikləri təqdirdə, onlara yanacaq və ya eniş xidmətləri təmin edilməyəcək, həmçinin bilet satışına icazə verilməyəcək. Əks təqdirdə, dollar sistemindən təcrid olunacaqsınız”, - deyə Bessent bildirib.
Bessent vurğulayıb ki, bu qadağaya əməl etməyən hər hansı tərəf beynəlxalq dollar maliyyə sistemindən kənarlaşdırılacaq. Bu, İran aviaşirkətləri ilə əməkdaşlıq etmək istəyən üçüncü tərəflər üçün ciddi risk yaradır.
Nazir həmçinin qeyd edib ki, ABŞ tərəfi İran aviaşirkətləri ilə hansı şirkətlərin və şəxslərin əməkdaşlıq etdiyi barədə tam məlumata malikdir.
