Azərbaycan Prezidenti İlham Əliyev telefon zəngi vasitəsilə Gürcüstanın Baş naziri İrakli Kobaxidzeni ad günü münasibətilə təbrik edib.
Azərbaycan dövlət başçısı İlham Əliyev Gürcüstanın Baş naziri İrakli Kobaxidze ilə telefon danışığı keçirib. Söhbət zamanı Prezident İlham Əliyev Kobaxidzeni ad günü münasibətilə təbrik edərək ona cansağlığı və işlərində uğurlar arzulayıb, bundan əlavə gürcü xalqına da rifah diləyib.
Bu barədə məlumat Prezidentin Mətbuat Xidməti tərəfindən yayılıb.
Gürcüstan Baş naziri öz növbəsində göstərilən diqqətə görə Azərbaycan Prezidentinə təşəkkürünü bildirib.
Telefon danışığı çərçivəsində tərəflər Azərbaycan və Gürcüstan arasında mövcud olan strateji tərəfdaşlıq münasibətləri, eləcə də qonşuluq əlaqələrinin daha da möhkəmləndirilməsi istiqamətində fikir mübadiləsi aparıblar.
