Qazaxıstanın Aktau şəhərindəki Azərbaycan diasporunun nümayəndələri Xəzər dənizində axtarış-xilasetmə əməliyyatı aparan hərbçilərə isti yemək, su və içki paylayıb.
Qazaxıstanın Aktau şəhərində məskunlaşmış azərbaycanlılar Xəzər dənizində davam edən axtarış-xilasetmə əməliyyatında iştirak edən hərbçi və xilasedicilərə dəstək göstəriblər. Sosial şəbəkələrdə yayılan görüntülərdə diaspor üzvlərinin əraziyə isti yemək, su və müxtəlif içkilər çatdırdığı görünür.
Bu yardım kampaniyası diaspor nümayəndələrinin, restoran sahiblərinin və digər könüllülərin öz şəxsi vəsaiti hesabına həyata keçirilib.
Qazaxıstandakı Azərbaycan icmasının təmsilçisi Elmir Şahsuvarov bildirib ki, azərbaycanlılar axtarış-xilasetmə işləri tamamlanana qədər ərazidə qalıb lazımi köməyi göstərməyə hazırdırlar.
Azərbaycanlılar axtarış-xilasetmə işləri başa çatanadək ərazidə qalmağa və lazımi dəstəyi göstərməyə hazırdırlar.
Azərbaycan icmasının bu ağır məqamda göstərdiyi həmrəylik yerli sakinlər tərəfindən yüksək qiymətləndirilib. Bu addım iki ölkə arasında tarixən mövcud olan dostluq, qarşılıqlı hörmət və qardaşlıq əlaqələrinin növbəti təzahürü kimi dəyərləndirilib.
Sentyabrın 24-də Qazaxıstan Xəzər dənizində hərbi təlim keçirərkən hava şəraitinin qəflətən pisləşməsi nəticəsində güclü dalğa 19 hərbçini dənizə sürükləyib. Bu hadisə nəticəsində 12 hərbi qulluqçu həlak olub.
Faciə ilə əlaqədar Qazaxıstanda 25 sentyabr tarixi ölkə üzrə milli matəm günü elan edilib. Hadisə ilə bağlı Qazaxıstan Silahlı Qüvvələrinin beş məsul vəzifəli şəxsi saxlanılıb.
