Baş nazir Əli Əsədov bildirib ki, gələn ilin dövlət büdcəsində müdafiə və milli təhlükəsizlik xərcləri 8,8 milyard manat, yəni ümumi xərclərin 21 faizini təşkil edəcək.
Baş nazir Əli Əsədov 2027-ci ilin dövlət büdcəsində hərbi sahəyə ayrılacaq vəsaitin həcmini açıqlayıb. Onun sözlərinə görə, ölkənin müdafiə qabiliyyətinin gücləndirilməsi hökumətin dəyişməz prioritetlərindən biri olaraq qalır.
“Hökumətin əsas və vacib prioritet xərc istiqaməti kimi dövlət büdcəsində ən böyük xərclərdən biri həmişə olduğu kimi hərbi-müdafiə və milli təhlükəsizliyinin daha da gücləndirilməsi xərcləri olacaqdır”
Bu fikirlər “Azərbaycan Respublikasının 2027-ci il üzrə dövlət büdcəsinin və icmal büdcənin layihələri və sonrakı üç il üçün icmal büdcənin göstəriciləri” və “Azərbaycan Respublikasının 2027-ci il və növbəti üç il üzrə iqtisadi və sosial inkişaf konsepsiyası və proqnoz göstəriciləri”nə həsr olunmuş iclasda səsləndirilib.
Baş nazirin açıqladığı məlumata əsasən, növbəti ilin dövlət büdcəsində müdafiə və milli təhlükəsizlik xərcləri 8,8 milyard manat həcmində planlaşdırılır ki, bu da ümumi büdcə xərclərinin 21 faizinə bərabərdir.
Əli Əsədov qeyd edib ki, Prezident İlham Əliyevin və Birinci vitse-prezident Mehriban Əliyevanın bilavasitə iştirakı və rəhbərliyi ilə işğaldan azad olunmuş bütün Qarabağ və Şərqi Zəngəzur ərazilərində genişmiqyaslı bərpa işləri aparılır. Bu işlərin məqsədi köçkünlərin dayanıqlı məskunlaşması və iqtisadi reinteqrasiyası üçün zəruri şəraitin yaradılmasıdır.
“Azərbaycan Respublikasının Prezidenti cənab İlham Əliyevin və Birinci vitse-prezident Mehriban xanım Əliyevanın birbaşa iştirakı və rəhbərliyi ilə işğaldan azad edilmiş bütün Qarabağ və Şərqi Zəngəzurda genişmiqyaslı bərpa-quruculuq işləri aparılır, dayanıqlı məskunlaşma və iqtisadi reinteqrasiya üçün zəruri şərait yaradılır. Vətən müharibəsindən sonra işğaldan azad olunmuş ərazilərə bu günə qədər 47 yaşayış məntəqəsinə, yəni 10 şəhər, 3 qəsəbə və 34 kəndə keçmiş məcburi köçkünlərin qayıdışı təmin edilib. Azad edilmiş ərazilərdə hazırda 93 mindən çox insan yaşayır, çalışır və təhsil alır. Ümumilikdə, 2020-ci ildən bəri 2026-cı il də daxil olmaqla işğaldan azad olunmuş ərazilərin yenidən qurulması və bərpası üçün dövlət büdcəsindən cəmi 25 milyard manatdan çox vəsait ayrılmışdır. 2027-ci ildə bu məqsədə 3,4 milyard manat vəsait nəzərdə tutulur”
Beləliklə, Vətən müharibəsindən sonra keçmiş məcburi köçkünlərin qayıtdığı yaşayış məntəqələrinin sayı və bərpaya yönəldilən vəsaitin ümumi həcmi barədə aşağıdakı rəqəmlər açıqlanıb:
