Kremlin mətbuat katibi Dmitri Peskov bəyan edib ki, Rusiya Ermənistanın suveren hüquqlarına hörmətlə yanaşır, lakin İrəvan Avropa İttifaqı ilə Avrasiya İqtisadi İttifaqı arasında aydın mövqe seçməlidir.
Rusiya Prezidentinin mətbuat katibi Dmitri Peskov ənənəvi brifinq zamanı bildirib ki, Moskva Ermənistanın suveren hüquqlarını tam qəbul edir, lakin İrəvan gec-tez Avropa İttifaqı (Aİ) və Avrasiya İqtisadi İttifaqı (Aİİ) arasında konkret istiqamət müəyyənləşdirməlidir.
Jurnalistlər Kreml nümayəndəsindən Ermənistan Baş naziri Nikol Paşinyanın bir müddət əvvəl səsləndirdiyi “İrəvan iki stulda oturmağa çalışmır, respublika yalnız bir stulda əyləşib” fikrini şərh etməsini xahiş ediblər.
Peskov bu sualı cavablandırarkən aşağıdakı fikirləri bildirib:
“Biz Ermənistanın bütün suveren hüquqlarına hörmətlə yanaşırıq, lakin bununla belə, Ermənistan Aİİ inteqrasiya prosesinin iştirakçısıdır. Tədricən başqa standartlara yönəlmək müxtəlif sahələrdə Aİİ qaydaları ilə uzlaşmayacaq. Moskva İrəvanın “Aİİ, yoxsa Aİ” seçimini etməli olduğunu bildirərkən məhz bu ziddiyyətləri nəzərdə tutur. Aİİ üçün üzv ölkələrdən heç birinin təşkilatda qüvvədə olan prinsiplərə zidd addım atmaması həyati əhəmiyyət kəsb edir.”
Sentyabrın 23-də Rusiya Xarici İşlər Nazirliyi də bu mövzuda çıxış edib. Nazirlik bildirib ki, Aİ-nin Ermənistanla əlaqələri genişləndirmək istəyi nümayişkaranə xarakter daşıyır və Brüsselin əsl məqsədi bu addımlarla Moskvaya ziyan vurmaqdır.
Xatırladaq ki, bundan bir qədər əvvəl Rusiya Ermənistanın Avropa İttifaqına inteqrasiya prosesini maliyyələşdirməkdən imtina etdiyini açıqlamışdı.
