ABŞ və Çin nümayəndə heyətləri Çin Sədri Si Cinpinin ABŞ-a gözlənilən səfərindən əvvəl Nyu-Yorkda iqtisadi və ticarət mövzularını müzakirə edəcək.
Çin Ticarət Nazirliyinin yaydığı açıqlamaya görə, Baş nazirin müavini He Lifengin rəhbərlik etdiyi Çin heyəti sentyabrın 19-dan 23-dək ABŞ-da olacaq. Səfər çərçivəsində tərəflər iqtisadi və ticarət sahəsində danışıqlar aparacaqlar.
Açıqlamada bildirilib ki, görüşlər zamanı tərəflər hər iki ölkənin liderləri arasında əldə olunmuş razılaşmalar əsasında qarşılıqlı əhəmiyyət kəsb edən iqtisadi və ticarət mövzularında məsləhətləşmələr aparacaqlar.
ABŞ tərəfindən əvvəllər verilən məlumata görə, Nyu-Yorkdakı görüşlərdə süni intellekt, ticarət əlaqələri, nadir torpaq elementləri kimi bir sıra iqtisadi məsələlər gündəmə gələcək.
Danışıqlarda ABŞ nümayəndə heyətinə maliyyə naziri Skott Bessent başçılıq edəcək. O, Çin tərəfi ilə süni intellektlə bağlı ortaq narahatlıqların müzakirəsinə açıq olduqlarını vurğulayıb:
Çin tərəfi ilə süni intellektin ortaq risklərini müzakirə etməyə açığıq.
Nyu-Yorkda keçiriləcək bu görüşlər Çin Sədri Si Cinpinin gələn həftə ABŞ-a planlaşdırılan səfərinə hazırlıq mərhələsi kimi qiymətləndirilir. Danışıqların əsas məqsədi liderlər arasında baş tutacaq görüşdən əvvəl iki ölkə arasında iqtisadi məsələlərin əlaqələndirilməsidir.
