İmişlidə 17-18 sentyabr tarixlərində kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair Dövlət Proqramının icra vəziyyəti müzakirə olunub.
İmişli rayonunda iki günlük tədbir çərçivəsində kənd təsərrüfatı, balıqçılıq və akvakultura sahələrinin inkişafına yönəlmiş Dövlət Proqramının icrası ilə bağlı görülən işlər nəzərdən keçirilib. Tədbirdə İmişli Rayon İcra Hakimiyyətinin başçısı Elçin Rzayev, Azərbaycan Respublikası Prezidentinin Administrasiyasının Ərazi-təşkilat məsələləri şöbəsinin sektor müdiri Qiyas Yusifov, Kənd Təsərrüfatı Nazirliyinin Heyvandarlığın təşkili və monitorinqi şöbəsinin müdiri Bayandur Rzayev, həmçinin Əlaqələndirmə Qərargahının üzvləri və digər aidiyyəti qurumların nümayəndələri iştirak edib.
İştirakçılar əvvəlcə rayonun fermer təsərrüfatlarına baş çəkərək əkin sahələrinin istifadəsi, suvarma işləri və ümumi vəziyyətlə yerində tanış olublar. Bu zaman fermerlərin qarşılaşdıqları problemlər dinlənilib və onların müraciətləri qeydə alınıb.
Sahə ziyarətlərindən sonra İmişli Rayon İcra Hakimiyyətinin inzibati binasında geniş tərkibli görüş təşkil olunub. Görüşdə çıxış edən Elçin Rzayev ölkədə kənd təsərrüfatının inkişafı və ərzaq təhlükəsizliyinin təmin olunması istiqamətində görülən işlərdən danışıb. O, aqrar potensialdan səmərəli istifadə, əkin sahələrinin dövriyyəyə cəlb edilməsi və məhsuldarlığın artırılması məsələlərinə toxunaraq, fermerlərin problemlərinin operativ həlli üçün qurumlar arasında koordinasiyanın gücləndirilməsinin zəruriliyini vurğulayıb.
Elçin Rzayev bildirib ki, İcra başçısının 10 iyul 2026-cı il tarixli 117 nömrəli Sərəncamı ilə yaradılan Əlaqələndirmə Qərargahı rayonda kənd təsərrüfatına dair məsələlərin tez həlli üçün müntəzəm iş aparır.
Azərbaycan Respublikası Prezidentinin Administrasiyasının Ərazi-təşkilat məsələləri şöbəsinin sektor müdiri Qiyas Yusifov çıxışında Dövlət Proqramının əhəmiyyətindən danışıb. O, proqramın kənd təsərrüfatının müasir tələblərə uyğunlaşdırılması, istehsal və məhsuldarlığın artırılması, kənd yerlərində məşğulluğun genişləndirilməsi və aqrar sahibkarlığın inkişafı baxımından mühüm rol oynadığını qeyd edib.
Kənd Təsərrüfatı Nazirliyinin Heyvandarlığın təşkili və monitorinqi şöbəsinin müdiri Bayandur Rzayev isə aqrar sektora göstərilən dövlət qayğısı, fermerlərə verilən subsidiyalar və bu dəstək mexanizmlərinin istehsalçılara yaratdığı üstünlüklər barədə ətraflı məlumat verib.
Tədbirin sonunda çıxış edən fermerlər dövlət tərəfindən göstərilən dəstəyə görə Prezident İlham Əliyevə minnətdarlıqlarını bildiriblər. Onlar Dövlət Proqramının icrasında fəal iştirak edəcəklərini vurğulayıblar.
