Brijit Bardonun əşyaları hərracda 954 min avroya satıldı

Fransada təşkil olunan hərracda görkəmli fransız aktrisası Brijit Bardonun şəxsi əşyaları gözlənilən qiymətdən qat-qat baha satılıb. İlkin qiymətləndirmə cəmi 50 min avro civarında olsa da, əşyaların ümumi satış məbləği 954 min avroya çatıb.

Hərracı təşkil edən Millon hərrac evinin nümayəndəsi Aleksandr Millon bildirib ki, aktrisanın adi əşyaları belə kolleksiyaçılar arasında böyük maraq doğurub.

“Bricit Bardo bir daha sübut etdi ki, misilsiz əlkimyaçıdır: o, təxminən 50 min avronu 1 milyon avroya çevirdi”, - deyib.

Hansı əşyalar satıldı?

Millon konkret nümunələr də təqdim edib. Belə ki:

• Cütü 30 avro dəyərində qiymətləndirilən iki it xaltasından ibarət lot 9400 avroya satılıb;
• 300 avro qiymətləndirilən gitara 8600 avroya, 500 avro dəyərindəki digər gitara isə 11900 avroya alıcı tapıb;
• 30 avro qiymətləndirilən suiti şəklində üç yumşaq oyuncaq isə 2200 avroya satılıb.

Vəsait vəhşi heyvanlara yönələcək

Hərracdan toplanan bütün gəlir aktrisanın sağlığında qurduğu Brijit Bardo Fonduna köçürüləcək. Bu fond vəhşi heyvanların qorunması məqsədilə yaradılıb.

Fransa kinosunun ən tanınmış simalarından biri olan Brijit Bardo 2025-ci il dekabrın 28-də 91 yaşında dünyasını dəyişib.