Ermənistanın Baş naziri Nikol Paşinyan bildirib ki, ölkəsi Rusiya ilə münasibətləri dərinləşdirmək niyyətindədir.
Ermənistanın Baş naziri Nikol Paşinyan Rusiya ilə əlaqələrin gələcəyinə dair açıqlama verib. Onun sözlərinə görə, Ermənistan Moskva ilə dostluq münasibətlərini genişləndirmək istiqamətində addımlar atmağı planlaşdırır.
Paşinyan bu fikirlərini "İzvestiya" nəşrinə müsahibəsində səsləndirib. Baş nazir ölkəsinin xarici siyasətdə tarazlaşdırma prinsipini rəhbər tutduğunu və beynəlxalq əlaqələrini müxtəlif istiqamətlərdə inkişaf etdirməyə çalışdığını bildirib.
Hökumət başçısı Azərbaycanla sülh prosesinin Rusiya ilə əlaqələrə də təsir göstərdiyini vurğulayıb. Onun sözlərinə əsasən, sülh əldə olunana qədər Ermənistan-Rusiya münasibətləri əsasən təhlükəsizlik məsələləri ətrafında qurulub, indi isə bu əlaqələrdə yeni transformasiya prosesi başlayır.
“Moskva ilə münasibətlərdə obyektiv dəyişikliklər baş verir. Azərbaycan və Ermənistan arasında sülh bərqərar olana qədər Rusiya ilə münasibətlər təhlükəsizlik məsələləri üzərində cəmləşmişdi, lakin indi onları transformasiya gözləyir”
Paşinyan əlavə edib ki, məqsəd sadəcə mövcud əlaqələri dəyişdirmək deyil, onları daha da möhkəmləndirməkdir. Baş nazirin sözlərinə görə, Ermənistan Rusiya ilə dostluq münasibətlərini həm transformasiya etmək, həm də dərinləşdirmək niyyətindədir.
