Xarici işlər naziri Ceyhun Bayramov Azərbaycan ərazilərinin minalarla genişmiqyaslı çirklənməsinin bərpa və qayıdış proseslərinə ciddi əngəl yaratdığını bildirib.
Xarici işlər naziri Ceyhun Bayramov Azərbaycan ərazilərinin minalarla genişmiqyaslı çirklənməsinin bərpa və qayıdış proseslərinə ciddi əngəl yaratdığını bildirib. Bu barədə o, BMT Baş Assambleyasının 81-ci sessiyasının ümumi müzakirələri çərçivəsində çıxış edərkən danışıb.
“Təəssüf ki, Azərbaycan ərazilərinin minalar və digər partlayıcı qurğularla genişmiqyaslı çirkləndirilməsi ciddi mane olaraq qalmaqdadır. Bu, bərpa və qayıdış prosesini əhəmiyyətli dərəcədə çətinləşdirir. 2020-ci ildə ərazilərin işğaldan azad edilməsindən sonra qadın və uşaqlar da daxil olmaqla, 400-dən çox insan mina qurbanına çevrilib. Son 30 il ərzində mina qurbanlarının ümumi sayı 3500 nəfəri ötüb”.
Nazirin sözlərinə görə, 2020-ci ildə işğaldan azad edilən ərazilərdə mina partlayışları nəticəsində qadın və uşaqlar da daxil olmaqla 400-dən artıq insan zərər çəkib. Son 30 ilin nəticələrinə əsasən isə ümumi qurban sayı 3500 nəfəri keçib.
Bayramov bildirib ki, problemin genişliyini nəzərə alaraq Azərbaycan humanitar mina təmizləmə fəaliyyətini insan hüquqlarının təmin olunması üçün ilkin zəruri şərt kimi dəyərləndirir. Bununla bağlı ölkə humanitar mina təmizlənməsini öz 18-ci Milli Dayanıqlı İnkişaf Məqsədi kimi rəsmən elan edib.
Nazir həmçinin münaqişə nəticəsində itkin düşmüş azərbaycanlıların taleyinin müəyyənləşdirilməsinin vacibliyini vurğulayıb. Onun sözlərinə görə, bu məsələ təkcə hesabatlılıq və qurban ailələrinin hüquqları baxımından deyil, münaqişədən sonrakı barışıq prosesi üçün də mühüm əhəmiyyət kəsb edir.
“Bu problemin miqyasını nəzərə alaraq, Azərbaycan mina təmizləmə fəaliyyətini insan hüquqlarının təmin olunması üçün zəruri ilkin şərt hesab edir və humanitar mina təmizlənməsini özünün 18-ci Milli Dayanıqlı İnkişaf Məqsədi kimi rəsmən bəyan edib. Eyni qaydada, münaqişə nəticəsində itkin düşmüş təxminən 4000 azərbaycanlının taleyi və yerinin müəyyən edilməsinin zəruriliyi təkcə hesabatlılıq, qurbanların və onların ailələrinin hüquqları baxımından deyil, həm də münaqişədən sonrakı barışıq və normallaşma prizmasından mühüm əhəmiyyət daşıyır”, - nazir qeyd edib.
