Milli Məclisin İnsan hüquqları komitəsinin iclasında deputat Səyyad Aran səhiyyə nazirinin vətəndaşlarla görüşlərində real problemi olan şəxslərin qəbula düşə bilmədiyini bildirib.
Milli Məclisin İnsan hüquqları komitəsinin bu gün keçirilən iclasında deputat Səyyad Aran səhiyyə nazirinin vətəndaşlarla keçirdiyi qəbullardakı təşkilati problemlərdən danışıb.
Onun sözlərinə görə, nazirin qəbuluna gəldiyi zaman ətraf ciddi nəzarətə alınır və adi insanların oraya yaxınlaşması demək olar ki, mümkün olmur.
"Səhiyyə naziri qəbula gedir. Bəndi-bərəni elə kəsdirirlər ki, ora yaxınlaşmaq olmur"
Səyyad Aran bildirib ki, qəbula əvvəlcədən müəyyən edilmiş, kəskin narazılığı olmayan insanlar daxil edilir. Onun fikrincə, bu adamlar əvvəldən siyahıya alınaraq içəri buraxılır.
"Əvvəlcədən nisbətən yumşaq, zərərsiz çıxışları olan adamları siyahıya alıb içəri buraxırlar. Qışda isti, yayda sərin otaqlarda insanları... Nəysə, bu sözü demək istəmirəm. Əsl şikayəti olan gedib sözünü nazirə deyə bilmir"
Deputat bu sözlərlə real problemi olan vətəndaşların öz şikayətlərini birbaşa nazirə çatdıra bilmədiklərini vurğulayıb.
