Suriya Prezidenti Əhməd əl-Şaraa Nyu-Yorkda keçirilən BMT Baş Assambleyasının 81-ci sessiyası çərçivəsində çıxış edərək Qolan təpələrinin Suriyaya məxsus olduğunu bəyan edib.
Suriya Prezidenti Əhməd əl-Şaraa "Atlantik Şurası" təşkilatının Nyu-Yorkda keçirdiyi panel müzakirəsində ölkəsinin Qolan təpələri ilə bağlı mövqeyini bir daha ortaya qoyub. Onun sözlərinə görə, bu ərazinin kimə aid olması ümumiyyətlə müzakirə mövzusu ola bilməz.
ABŞ Prezidenti Donald Trampın Qolan təpələri üzərində İsrailin suverenliyini tanıması ilə bağlı ona ünvanlanan sual zamanı Əhməd əl-Şaraa Ağ Evdə Tramp ilə keçirdikləri görüşü xatırlayıb. O bildirib ki, bu görüş zamanı Tramp mövzu ilə bağlı zarafat da edib.
Suriya prezidentinin sözlərinə görə, Tramp Qolan təpələri üzərində İsrailin suverenliyindən danışarkən belə deyib:
“Niyə Nyu-Cersini israillilərə vermirsiniz? Qolan təpələri sizin mülkiyyətinizdə deyil ki, onu onlara verəsiniz, amma Nyu-Cersi sizə məxsusdur. Hesab edirəm ki, Nyu-Cersi Demokratlarla doludur və onlar Trampa səs vermirlər. Buna görə də onu israillilərə vermək yaxşı olardı”
Əl-Şaraa bu sözlərə cavab olaraq öz reaksiyasını da bölüşüb:
“Heç olmasa, bu, sizin sahib olduğunuz bir ərazidir. Prezident Tramp Qolan təpələrinin sahibi deyil”
Əhməd əl-Şaraa bildirib ki, Tramp Suriyanın yanında olub, ölkəyə dəstək verib və Suriyaya qarşı tətbiq edilmiş sanksiyaların ləğvi ilə bağlı tarixi qərar qəbul edib. O həmçinin Tramp ilə "çox xüsusi münasibətlərinin" olduğunu vurğulayıb.
Zarafatdan asılı olmayaraq, Suriya prezidenti Qolan təpələrinin mənsubiyyəti barədə qəti mövqeyini bildirib:
“Bu zarafatdan asılı olmayaraq, Qolan təpələri öz xalqına məxsusdur. Nə Suriya prezidenti, nə Amerika prezidenti, nə də hər hansı başqa bir şəxs onları başqalarına verə və ya onlardan imtina edə bilər”
