İran Prezidenti Məsud Pezeşkian bildirib ki, ölkənin Ali rəhbəri Müctəba Xamenei sağlamdır və hökumət üzərində tam nəzarətə malikdir.
İran Prezidenti Məsud Pezeşkian "Fox News" telekanalının "Special Report" proqramına müsahibəsində Ali rəhbər Müctəba Xameneinin sağlamlıq vəziyyəti barədə açıqlama verib.
Pezeşkianın sözlərinə görə, təxminən bir ay əvvəl o, Xamenei ilə üzbəüz görüşüb və bu görüş təxminən yeddi saat davam edib. Prezident görüşün dəqiq tarixini xatırlamadığını qeyd edib.
"Dəqiq tarixləri xatırlamıram. Təxminən bir ay, bir ay yarım əvvəl idi. Biz təxminən yeddi saat görüşdük", - deyə Pezeşkian bildirib.
O, bu görüşün üzbəüz formatda keçdiyini bir daha vurğulayıb:
"Əvvəl də dediyim kimi, biz üzbəüz danışıqlar apardıq".
Pezeşkian Ali rəhbərin sağlamlığı ilə bağlı fikirlərini davam etdirərək bildirib ki, Xamenei İran hökumətinin idarə olunması üzərində tam nəzarətə malikdir. Prezidentin sözlərinə görə, əməli siyasətlərin icrası hökumətin və administrasiyanın öhdəsindədir, lakin ümumi istiqamət və məsləhətlər birbaşa Ali rəhbərdən gəlir.
"Tamamilə elədir. Siyasətlərin həyata keçirilməsi administrasiyanın və hökumətin əlindədir. Lakin məsləhətləşmələr və istiqamətlər oradan gəlir", - deyə İran Prezidenti bildirib.
