Dövlət Gömrük Komitəsinin Daxili Təhlükəsizlik İdarəsi Aksizli Mallar üzrə Baş Gömrük İdarəsində keçirdiyi yoxlama zamanı qaydapozmalar aşkarlayıb, nəticədə bir neçə əməkdaş vəzifəsindən azad edilib.
Dövlət Gömrük Komitəsinin Daxili Təhlükəsizlik İdarəsi Aksizli Mallar üzrə Baş Gömrük İdarəsində daxili yoxlama həyata keçirib. Yoxlama zamanı gömrük orqanına təqdim olunmuş nəqliyyat vasitələrinin rəsmiləşdirilməsi prosesində mühərrik həcminin səhv hesablandığı ortaya çıxıb.
Aşkarlanmış nöqsanlara görə Dövlət Gömrük Komitəsinin sədri, general-polkovnik Şahin Bağırov iki əməkdaşı vəzifəsindən azad edib. Bunlar baş inspektor, gömrük xidməti kapitanı Elçin Tofiq oğlu Vəlizadə və ekspert-auditor Babək İsa oğlu Nəsibovdur.
Aksizli Mallar üzrə Baş Gömrük İdarəsinin Rəsmiləşdirmə mərkəzinin bir neçə əməkdaşına da xəbərdarlıq edilib. Bu şəxslər sırasında baş inspektor, gömrük xidməti polkovnik-leytenantı Mehdi Qadir oğlu Rüstəmov, baş inspektor, gömrük xidməti mayoru Qasımbala Məmmədəğa oğlu Tağıyev, böyük inspektor, gömrük xidməti baş leytenantı Cavid Hikmət oğlu İbrahimli və inspektor, gömrük xidməti mayoru Füzuli Səroj oğlu İbrahimov var.
“Azərterminalkompleks” Birliyinin Ərazi şöbələrinin fəaliyyətinin əlaqələndirilməsi idarəsinin Bakı şöbəsində çalışan ekspert-auditor Rəfail Təvəkkül oğlu Ələkbərov da intizam məsuliyyətinə cəlb olunub.
Qeyd olunmalıdır ki, Aksizli Mallar üzrə Baş Gömrük İdarəsinə general-mayor Vəzir Həsənov rəhbərlik edir.
