Dövlət Sosial Müdafiə Fondu bu ilin yanvar-avqust aylarında pensiya, müavinət, təqaüd və ünvanlı dövlət sosial yardımı üzrə əhaliyə ümumilikdə 7 milyard manat vəsait ödəyib.
Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Sosial Müdafiə Fondu 2024-cü ilin ilk səkkiz ayında əhaliyə 7 milyard manat vəsait köçürüb. Bu barədə nazirlik tərəfindən yayılan məlumatda bildirilib.
Ödənilən məbləğin əsas hissəsi pensiyalara yönəlib - 5 milyard 222 milyon manat. Bundan əlavə, müavinətlər üzrə 961 milyon manat, təqaüdlər üzrə 542 milyon manat, ünvanlı dövlət sosial yardımı üzrə isə 270 milyon manat vəsait əhaliyə çatdırılıb.
Sənəddə qeyd olunur ki, cari ilin yanvar-avqust aylarında sosial ödənişlərə ayrılan vəsait ötən ilin eyni dövrünə nisbətən 633 milyon manat, yəni 10 faiz artıb. Bu artım pensiya, müavinət, təqaüd və ünvanlı dövlət sosial yardımının ümumi məcmusunda öz əksini tapıb.
