Şamaxı “ASAN Həyat” kompleksində “Şəhərsalma və Memarlıq İli” çərçivəsində 7-ci “Yaşıl dağ” ekoloji-sosial aksiyası təşkil olunub, tədbir zamanı 200 tondan çox kağız tullantıdan hazırlanmış simvolik “dağ” nümayiş etdirilib.
Şamaxı şəhərindəki “ASAN Həyat” kompleksində növbəti “Yaşıl dağ” ekoloji-sosial aksiyası baş tutub. Tədbir “Şəhərsalma və Memarlıq İli” çərçivəsində artıq 7-ci dəfə keçirilib.
Aksiyanın təşkilatçıları ASAN könüllülərinin “Yaşıl ASAN” ekoloji proqramı, IDEA İctimai Birliyi və “Azərsun Kağız və Karton İstehsalat Korporasiyası” olub. Layihənin əsas hədəfi kağız tullantılarının təkrar emalını genişləndirməklə ağaçların qorunmasına, təbii mühitin mühafizəsinə və ekoloji tarazlığın saxlanmasına töhfə verməkdir.
Aksiyaya Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev qatılıb. Tədbirdə Şamaxı Rayon İcra Hakimiyyətinin başçısı Tahir Məmmədov da iştirak edib.
Bundan başqa, müxtəlif rayonlardan ictimaiyyət nümayəndələri və digər qonaqlar da tədbirə qoşulub.
Tədbir çərçivəsində 200 tondan artıq kağız tullantıdan yığılmış “Yaşıl dağ” nümayiş etdirilib. Bundan əlavə, ASAN könüllülərinin və məktəblilərin tullantı materiallardan hazırladıqları əl işləri sərgilənib, mədəniyyət guşəsi qurulub və müxtəlif musiqi ifaları təqdim olunub.
7-ci “Yaşıl dağ” aksiyasına Azərbaycanın 30-dan artıq şəhər və rayonundan idarə, təşkilat, vətəndaş və məktəblilər dəstək verib.
Layihə çərçivəsində 11 il ərzində 2400 tondan çox kağız tullantısı təkrar emala göndərilib. Bu, 40.800-dən çox ağacın kəsilməsinin qarşısını almağa imkan verib.
Həmçinin bu müddətdə 600-dən çox ekoloji layihə həyata keçirilib, 200-dən çox təmizlik və ağacəkmə aksiyası təşkil olunub.
